سیکیورٹی فورسز کی کارروائیاں، 4 اہم کمانڈرز سمیت 9 خارجی ہلاک

شمالی وزیرستان: خیبرپختونخوا میں سیکیورٹی فورسز کی فتنہ الخوارج کے خلاف کارروائیاں جاری ہیں، شمالی وزیرستان میں انٹیلی جنس بیسڈ آپریشن کے دوران 4 اہم کمانڈرز سمیت 9 خارجی ہلاک ہوگئے۔

سیکیورٹی ذرائع کے مطابق کارروائیاں شمالی وزیرستان کے علاقوں پلنگ زئی، ندیم کوٹ اور کوٹ خضری میں کی گئیں۔ کارروائی کے دوران ہلاک ہونے والے اہم کمانڈرز میں خارجی خالد رضا، خارجی کامران، خارجی موسیٰ اور خارجی مفتوم شامل ہیں۔

ذرائع کا کہنا ہے کہ مؤثر کارروائی کے دوران ہلاک دہشتگردوں سے بھاری مقدار میں اسلحہ اور گولہ بارود بھی برآمد کیا گیا، جبکہ عزمِ استحکام ویژن کے تحت جاری کارروائیوں میں فتنہ الخوارج کے متعدد ٹھکانے بھی تباہ کیے گئے۔

وزیراعظم شہباز شریف نے شمالی وزیرستان میں کامیاب کارروائی پر سیکیورٹی فورسز کے افسران اور اہلکاروں کو خراجِ تحسین پیش کیا۔ انہوں نے 4 اہم کمانڈرز سمیت 9 دہشتگردوں کی ہلاکت پر سیکیورٹی فورسز کی پیشہ ورانہ صلاحیتوں کو سراہا۔

وزیراعظم نے کہا کہ شمالی وزیرستان کے مختلف علاقوں میں فتنہ الخوارج کے خلاف مؤثر کارروائیاں دہشتگردی کے مکمل خاتمے کے لیے پاکستان کے غیر متزلزل عزم کی عکاس ہیں۔

شہباز شریف کا کہنا تھا کہ سیکیورٹی فورسز کے افسران اور جوان دہشتگردی کے خاتمے اور ملک میں پائیدار امن کے قیام کے لیے قابلِ تحسین خدمات انجام دے رہے ہیں۔ دہشتگردوں کو ملک میں بدامنی پھیلانے اور اپنے مذموم عزائم میں کامیاب نہیں ہونے دیا جائے گا۔