خیبر پختونخوا اور بلوچستان میں سکیورٹی فورسز کی کارروائیاں، 11 خارجی دہشتگرد ہلاک

بنوں/جنوبی وزیرستان/خضدار: خیبر پختونخوا اور بلوچستان میں سکیورٹی فورسز کی مختلف کارروائیوں کے دوران 11 خارجی دہشتگرد ہلاک ہوگئے۔ سکیورٹی ذرائع کے مطابق آپریشنز بنوں، جنوبی وزیرستان اور بلوچستان کے ضلع خضدار میں کیے گئے۔

بنوں میں 2 دہشتگرد ہلاک

سکیورٹی ذرائع کے مطابق بنوں میں انٹیلی جنس بیسڈ آپریشن کے دوران 2 دہشتگرد مارے گئے۔ کارروائی کے بعد ہلاک دہشتگردوں کے قبضے سے اسلحہ اور گولہ بارود برآمد کیا گیا۔

سکیورٹی فورسز نے بارودی مواد کی مدد سے دہشتگردوں کے ٹھکانے کو بھی تباہ کردیا۔

جنوبی وزیرستان میں 5 دہشتگرد مارے گئے

جنوبی وزیرستان کے علاقے لدھا میں خفیہ اطلاع پر کیے گئے آپریشن کے دوران 5 خارجی دہشتگرد ہلاک ہوئے۔

ذرائع کے مطابق سکیورٹی فورسز نے دہشتگردوں کی نقل و حرکت کا بروقت سراغ لگایا، جس کے بعد مؤثر کارروائی کرتے ہوئے ان کے ٹھکانے کو نشانہ بنایا گیا۔

خضدار میں 4 دہشتگرد ہلاک

بلوچستان کے ضلع خضدار کے علاقے ساسول میں فتنہ الہندوستان کے خلاف کارروائی کے دوران 4 دہشتگردوں کو ہلاک کردیا گیا۔

سکیورٹی ذرائع کے مطابق دہشتگردوں کو کوارڈ کاپٹر کی مدد سے مؤثر انداز میں نشانہ بنایا گیا۔

ذرائع کا کہنا ہے کہ تمام کارروائیوں کے دوران عوام کے جان و مال اور مقامی آبادی کے تحفظ کو یقینی بنایا گیا۔

دہشتگردی کے خاتمے تک کارروائیاں جاری رکھنے کا عزم

سکیورٹی ذرائع کے مطابق ملک سے دہشتگردی کے مکمل خاتمے تک عزمِ استحکام کے تحت کارروائیاں جاری رہیں گی۔ ان کارروائیوں کا مقصد دہشتگرد نیٹ ورکس کے خلاف مؤثر کارروائی اور ملک میں امن و استحکام کو نقصان پہنچانے کی کوششوں کو ناکام بنانا ہے۔

واضح رہے کہ پانچ روز قبل بھی خیبر پختونخوا اور بلوچستان میں سکیورٹی فورسز اور پولیس کی مختلف کارروائیوں کے دوران 49 دہشتگرد ہلاک کیے گئے تھے۔

آئی ایس پی آر کے مطابق ان کارروائیوں کے دوران دہشتگردوں کے ٹھکانوں سے بڑی مقدار میں دھماکا خیز مواد، آئی ای ڈی ڈیٹونیٹنگ ریموٹس، اسلحہ، گولہ بارود اور موٹر سائیکلیں برآمد کی گئی تھیں۔

آئی ایس پی آر کا کہنا تھا کہ کارروائیوں کے بعد متعلقہ علاقوں میں کلیئرنس آپریشنز جاری ہیں تاکہ باقی موجود دہشتگردوں کا سراغ لگا کر انہیں بھی ختم کیا جاسکے۔