عوام کو زیادہ سے زیادہ ریلیف دیا جائے، صدر آصف زرداری کی وزیراعظم شہباز شریف کو ہدایت

(اسلام آباد) صدر مملکت آصف علی زرداری نے وزیراعظم شہباز شریف کو ہدایت کی ہے کہ مشکل علاقائی صورتحال اور عالمی کشیدگی کے باوجود عوام کو زیادہ سے زیادہ ریلیف فراہم کیا جائے۔

ایوانِ صدر میں ہونے والی ملاقات میں نائب وزیرِاعظم و وزیرِخارجہ اسحاق ڈار، سپیکر قومی اسمبلی سردار ایاز صادق، وفاقی وزیرِ داخلہ محسن نقوی، وفاقی وزیرِقانون اعظم نذیر تارڑ، سینیٹر سلیم مانڈوی والا اور ڈاکٹر عاصم حسین بھی شریک تھے۔

ایوان صدر کے میڈیا ونگ کے مطابق ملاقات میں ملک کی مجموعی صورتحال، افغانستان سے متعلق امور اور خطے میں بدلتی ہوئی صورتحال پر تفصیلی تبادلہ خیال کیا گیا۔

ملاقات کے دوران “معرکۂ حق” کے شہداء اور پاکستان کی مسلح افواج کی پیشہ ورانہ صلاحیتوں کو خراج تحسین پیش کیا گیا جبکہ قومی دفاع کے حوالے سے غیر متزلزل عزم کا اعادہ بھی کیا گیا۔

صدر مملکت نے کہا کہ مشرق وسطیٰ میں کشیدگی، پیچیدہ جغرافیائی حالات اور سپلائی چین متاثر ہونے کے باوجود حکومت عوامی ریلیف کو ترجیح دے۔

انہوں نے مہنگائی کے دباؤ میں کمی، اشیائے ضروریہ کی بلا تعطل دستیابی اور عام آدمی کو ریلیف فراہم کرنے کیلئے ممکنہ اقدامات کرنے کی بھی ہدایت کی۔