وزیراعظم شہباز شریف کی سعودی ولی عہد محمد بن سلمان سے اہم ملاقات

(جدہ) وزیراعظم شہباز شریف نے سعودی ولی عہد شہزادہ محمد بن سلمان سے جدہ میں اہم ملاقات کی، جس میں خطے کی بدلتی ہوئی صورتحال، علاقائی کشیدگی اور باہمی تعاون کے فروغ پر تفصیلی تبادلہ خیال کیا گیا۔

ترجمان کے مطابق وزیراعظم شہباز شریف اور سعودی ولی عہد کے درمیان ملاقات تقریباً دو گھنٹے جاری رہی، جس میں دونوں رہنماؤں نے باہمی دلچسپی کے امور سمیت خطے کی مجموعی صورتحال پر گفتگو کی۔

وزیراعظم شہباز شریف نے حالیہ علاقائی کشیدگی کے تناظر میں سعودی عرب کے ساتھ مکمل یکجہتی کا اظہار کرتے ہوئے کہا کہ پاکستانی عوام اپنے سعودی بھائیوں کے ساتھ شانہ بشانہ کھڑے ہیں۔ انہوں نے سعودی عرب کے صبر و تحمل اور بردباری کو سراہتے ہوئے کہا کہ ولی عہد محمد بن سلمان کی قیادت بحران کے دوران امن پسند قوتوں کے لیے طاقت کا ذریعہ ہے۔

وزیراعظم نے سعودی ولی عہد کو پاکستان کی جانب سے امن کے قیام کیلئے کی جانے والی سفارتی کوششوں سے بھی آگاہ کیا اور بتایا کہ پاکستان کی کوششوں کے نتیجے میں امریکا اور ایران کے درمیان جنگ بندی ممکن ہوئی۔ انہوں نے اسلام آباد میں ہونے والے تاریخی مذاکرات کے حالیہ دور پر بھی بریفنگ دی۔

ترجمان کے مطابق سعودی ولی عہد محمد بن سلمان نے وزیراعظم شہباز شریف اور فیلڈ مارشل کے امن عمل میں تعمیری کردار کو سراہا اور خطے میں استحکام کیلئے پاکستان کی کوششوں کو مثبت قرار دیا۔

وزیراعظم شہباز شریف نے پاکستان کے معاشی استحکام میں سعودی عرب کی مسلسل حمایت پر شکریہ ادا کرتے ہوئے کہا کہ دونوں ممالک کے درمیان تعلقات تاریخی، مضبوط اور اسٹریٹجک نوعیت کے حامل ہیں۔ انہوں نے مزید کہا کہ پاکستان اور سعودی عرب اسٹریٹجک باہمی دفاعی معاہدے کے تحت قریبی دفاعی شراکت دار ہیں۔

ملاقات کے اختتام پر دونوں رہنماؤں نے باہمی تعاون کو مزید فروغ دینے اور خطے میں امن و استحکام کیلئے مشترکہ کوششیں جاری رکھنے کے عزم کا اعادہ کیا۔