بجٹ میں عوام کو ریلیف دینے کیلئے اقدامات کیے جارہے ہیں، وزیراعظم

(اسلام آباد) وزیراعظم شہباز شریف نے کہا ہے کہ حکومت آئندہ بجٹ میں عوام کو زیادہ سے زیادہ ریلیف فراہم کرنے کے لیے اقدامات کر رہی ہے، جبکہ غیر رسمی معیشت کو ٹیکس نیٹ میں شامل کرنے پر بھی خصوصی توجہ دی جا رہی ہے۔

اسلام آباد میں معروف صنعتکاروں اور ممتاز کاروباری شخصیات کے وفد نے وزیراعظم شہباز شریف سے ملاقات کی، جس میں ملکی معاشی صورتحال، اقتصادی ترقی اور وفاقی بجٹ کے حوالے سے تفصیلی مشاورت کی گئی۔ وفد میں میاں محمد منشا، عارف حبیب، عاطف باجوہ، محمد علی ٹبہ اور مصدق ذوالقرنین سمیت ملک کی نمایاں کاروباری شخصیات شامل تھیں۔

ملاقات کے دوران وزیراعظم نے صنعتکاروں اور کاروباری برادری کو پاکستان کا سفیر قرار دیتے ہوئے کہا کہ دنیا میں پاکستان کی مثبت شناخت کے فروغ میں نجی شعبے کا اہم کردار ہے۔ انہوں نے مشکل معاشی حالات میں حکومت کا ساتھ دینے پر کاروباری برادری کا شکریہ ادا کیا۔

شہباز شریف کا کہنا تھا کہ حکومت اور نجی شعبے کے درمیان مضبوط شراکت داری معاشی ترقی کی ضامن ہے۔ پاکستان کی معیشت سے متعلق پالیسی سازی میں کاروباری برادری سے مشاورت کو انتہائی اہمیت دی جاتی ہے تاکہ زمینی حقائق کے مطابق مؤثر فیصلے کیے جا سکیں۔

وزیراعظم نے کہا کہ حکومت عوام کو ریلیف دینے کے ساتھ ساتھ غیر رسمی معیشت کو دستاویزی شکل دینے اور ٹیکس نیٹ کو وسعت دینے کے لیے اقدامات کر رہی ہے۔ ان کے مطابق کاروبار دوست پالیسیوں کے نتیجے میں ملکی معیشت میں استحکام آیا ہے اور بیرونی سرمایہ کاروں کا اعتماد بھی بحال ہوا ہے۔

انہوں نے مزید کہا کہ حکومت برآمدات پر مبنی ترقی کی حکمت عملی پر عمل پیرا ہے، جبکہ صنعت، زراعت اور انفارمیشن ٹیکنالوجی کے شعبوں کی ترقی کے ذریعے معیشت کو مزید مضبوط بنایا جائے گا اور روزگار کے نئے مواقع پیدا ہوں گے۔

ملاقات میں شریک کاروباری وفد نے حکومت کی جانب سے ٹیکس اصلاحات، کاروباری آسانیوں اور سرمایہ کاری کے فروغ کے اقدامات کو سراہا۔ وفد کو صنعت، تجارت اور کاروباری سرگرمیوں کے فروغ کے لیے کیے جانے والے حکومتی اقدامات پر تفصیلی بریفنگ بھی دی گئی۔