معرکۂ حق اللہ تعالیٰ کے انعامات اور قومی استقامت کی علامت ہے: وزیراعظم شہباز شریف

شہباز شریف نے معرکۂ حق کی پہلی سالگرہ پر اپنے خصوصی پیغام میں کہا ہے کہ یہ دن اللہ تعالیٰ کے بے شمار انعامات اور احسانات کی یاد دلاتا ہے، جبکہ پوری قوم کیلئے سجدۂ شکر بجا لانے کا موقع بھی ہے۔

اپنے پیغام میں وزیراعظم نے کہا کہ ہماری بہادر افواج نے دشمن کو عبرتناک شکست سے دوچار کیا اور پاکستان کے دفاع کو ناقابلِ تسخیر بنا دیا۔

انہوں نے کہا کہ آج ہم اس عزم، جرات اور استقامت کو خراجِ تحسین پیش کر رہے ہیں جس کا مظاہرہ پوری پاکستانی قوم نے آزمائش کی گھڑی میں کیا، قوم سیسہ پلائی دیوار کی مانند متحد ہو کر کھڑی رہی۔

وزیراعظم شہباز شریف نے کہا کہ قوم اپنے شہداء، غازیوں اور ان کے اہل خانہ کو سلام پیش کرتی ہے، جنہوں نے وطن کے دفاع کیلئے لازوال قربانیاں دیں۔

انہوں نے مزید کہا کہ افواجِ پاکستان نے بری، بحری، فضائی اور سائبر محاذوں پر مربوط اور مؤثر ردعمل دے کر دشمن کے عزائم ناکام بنائے، جبکہ افواج کی پیشہ ورانہ مہارت اور منظم کارروائیوں نے پاکستان کو ایک مضبوط اور ناقابلِ تسخیر قوت کے طور پر منوایا۔