پی آئی اے نجکاری مکمل، پاکستان کی معاشی اصلاحات میں تاریخی سنگ میل قرار: وزیراعظم شہباز شریف

(اسلام آباد) وزیراعظم شہباز شریف نے پاکستان انٹرنیشنل ایئرلائن (پی آئی اے) کی نجکاری کے فرسٹ فنانشل کلوزنگ کی کامیاب تکمیل پر قوم کو مبارکباد دیتے ہوئے اسے ملکی معیشت اور اصلاحاتی عمل میں ایک تاریخی سنگ میل قرار دیا ہے۔

وزیراعظم کے مطابق تمام طے شدہ شرائط مکمل ہونے کے بعد پی آئی اے کا انتظامی کنٹرول عارف حبیب کارپوریشن کی سربراہی میں قائم سرمایہ کار کنسورشیم کے حوالے کر دیا گیا ہے۔

انہوں نے کہا کہ حکومت نے ایک پیچیدہ مگر انتہائی اہم نجکاری کے عمل کو مکمل شفافیت کے ساتھ کامیابی سے پایۂ تکمیل تک پہنچایا، جو پاکستان کی معاشی پالیسیوں میں ایک بڑی پیش رفت ہے۔

شہباز شریف نے کہا کہ اس اقدام کے بعد پی آئی اے اور ملکی معاشی اصلاحات کے لیے ایک نئے دور کا آغاز ہوا ہے، اور یہ پیش رفت ملکی و غیر ملکی سرمایہ کاروں کے لیے مثبت پیغام ہے کہ پاکستان سرمایہ کاری، اصلاحات اور معاشی ترقی کے لیے تیار ہے۔

وزیراعظم نے کہا کہ فرسٹ فنانشل کلوزنگ کے بعد قومی ایئرلائن کو اس کی سابقہ ساکھ اور معیار واپس دلانے کی کوششیں مزید تیز ہوں گی۔ انہوں نے یقین دہانی کرائی کہ ملازمین، مسافروں اور صارفین کے مفادات کا مکمل تحفظ یقینی بنایا جائے گا۔

ان کے مطابق پی آئی اے کی پروازوں، آپریشنز اور خدمات میں کسی قسم کا تعطل نہیں آئے گا جبکہ تمام فضائی قوانین اور ریگولیٹری نگرانی بدستور جاری رہے گی۔

وزیراعظم نے اس کامیابی پر نائب وزیراعظم اسحاق ڈار، وزیر دفاع خواجہ آصف، وزیر خزانہ محمد اورنگزیب، مشیر برائے نجکاری محمد علی، کابینہ کمیٹی برائے نجکاری اور نجکاری کمیشن کے ارکان سمیت تمام متعلقہ اداروں کی کوششوں کو سراہا۔ انہوں نے کہا کہ ٹیم ورک اور “ہول آف دی گورنمنٹ اپروچ” کے باعث یہ اہم پیش رفت ممکن ہوئی ہے، جو حکومت کے معاشی اصلاحاتی ایجنڈے میں ایک بڑی کامیابی ہے۔