سہیل آفریدی کا لانگ مارچ کے روٹ میں ایک بار پھر تبدیلی کا اعلان

پشاور: پاکستان تحریک انصاف کے جاری لانگ مارچ کے حوالے سے اہم پیش رفت سامنے آگئی، وزیراعلیٰ خیبرپختونخوا سہیل آفریدی نے لانگ مارچ کے اگلے مرحلے کے پروگرام کو حتمی شکل دے دی۔

نئے شیڈول کے مطابق وزیراعلیٰ خیبرپختونخوا آج 8 اکتوبر کو پشاور کے مختلف مقامات پر اجتماعات سے خطاب کریں گے اور رات پشاور میں قیام کریں گے۔

لانگ مارچ کے شرکاء 9 اکتوبر کو چارسدہ جائیں گے، جہاں رات کا قیام ہوگا، جبکہ 10 اکتوبر کو قافلے مردان کا رخ کریں گے اور رات مردان میں ہی قیام کریں گے۔

شیڈول کے مطابق 11 اکتوبر کو لانگ مارچ کے تمام قافلے صوابی پہنچیں گے، جہاں وزیراعلیٰ سہیل آفریدی اگلے لائحہ عمل کا اعلان کریں گے۔

وزیراعلیٰ خیبرپختونخوا 11 اکتوبر تک مختلف اضلاع میں عوام اور کارکنوں کے درمیان موجود رہیں گے اور لانگ مارچ کے اگلے مرحلے کی قیادت کریں گے۔

دوسری جانب پی ٹی آئی کے صوبائی جنرل سیکرٹری علی اصغر نے تمام ضلعی تنظیموں، منتخب نمائندوں اور کارکنوں کو ہدایت کی ہے کہ لانگ مارچ کے شرکاء کے منظم استقبال اور عوامی رابطے کو یقینی بنایا جائے۔