ٹرمپ جنگ اور بحرانوں سے نکلنے کے لیے باعزت راستہ تلاش کر رہے ہیں، ایران کا دعویٰ

(تہران) ایرانی افواج کے سینئر ترجمان بریگیڈیئر جنرل ابوالفضل شکارچی نے دعویٰ کیا ہے کہ امریکی صدر ڈونلڈ ٹرمپ جنگ اور جاری عالمی بحرانوں سے نکلنے کے لیے ایک "باعزت راستہ" تلاش کر رہے ہیں۔

اپنے ایک بیان میں بریگیڈیئر جنرل ابوالفضل شکارچی نے کہا کہ ڈونلڈ ٹرمپ نے زمینی حقائق کے مطابق فیصلے کرنے کے بجائے زیادہ تر نعروں، سوشل میڈیا پیغامات اور میڈیا مہمات پر انحصار کیا۔ ان کے بقول، امریکی صدر اب موجودہ صورتحال سے نکلنے کے لیے اپنی سیاسی ساکھ برقرار رکھنے کی حکمت عملی بنا رہے ہیں۔

ایرانی فوج کے ترجمان نے کہا کہ ایران نے عملی طور پر دنیا کو دکھا دیا ہے کہ حقیقی طاقت ایرانی عوام کے عزم، مسلح افواج کی جرات اور اسلامی انقلاب کی قیادت میں پوشیدہ ہے۔ انہوں نے دعویٰ کیا کہ ماضی میں امریکی فوج کو دنیا کی طاقتور ترین فوج سمجھا جاتا تھا، تاہم آج عالمی رائے عامہ یہ سمجھنے لگی ہے کہ اس تاثر کا بڑا حصہ پروپیگنڈا اور مبالغہ آرائی پر مبنی تھا۔

ابوالفضل شکارچی کا کہنا تھا کہ ایران نے میدانِ جنگ میں اپنے مخالفین کو مؤثر جواب دیا ہے اور مستقبل میں بھی دیتا رہے گا۔ انہوں نے مزید کہا کہ نعرے، ٹوئٹس اور نفسیاتی جنگ کسی بھی صورت میں امریکہ کے بنیادی مسائل کا حل نہیں ہیں۔

امریکی پالیسیوں پر تنقید کرتے ہوئے ایرانی ترجمان نے دعویٰ کیا کہ ٹرمپ انتظامیہ کی ہر کارروائی کے جواب میں امریکہ کو کئی گنا زیادہ نقصان اٹھانا پڑا ہے اور اگر یہی پالیسی جاری رہی تو اسے مزید بڑے چیلنجز اور نقصانات کا سامنا کرنا پڑ سکتا ہے۔