سری لنکن ٹیسٹ کرکٹ ٹیم کے کپتان دھننجایا ڈی سلوا مستعفی

کولمبو: سری لنکن ٹیسٹ کرکٹ ٹیم کے کپتان دھننجایا ڈی سلوا نے ٹیسٹ ٹیم کی قیادت سے استعفیٰ دے دیا۔

دھننجایا ڈی سلوا نے کہا ہے کہ وہ قیادت کی ذمہ داری اگلی نسل کو منتقل کرنا چاہتے ہیں، تاہم وہ بطور کھلاڑی قومی ٹیم کے لیے دستیاب رہیں گے۔

دھننجایا ڈی سلوا کا کپتانی چھوڑنے کا فیصلہ ایسے وقت میں سامنے آیا ہے جب سری لنکا کی اگلی ٹیسٹ اسائنمنٹ پاکستان کے خلاف دو ٹیسٹ میچز کی سیریز ہے، جس کا آغاز 9 نومبر کو راولپنڈی میں ہوگا۔

سری لنکا کرکٹ کے چیف ایگزیکٹو ایشلے ڈی سلوا نے دھننجایا ڈی سلوا کا ٹیسٹ ٹیم کی قیادت کرنے پر شکریہ ادا کرتے ہوئے ان کے بقیہ کیریئر کے لیے نیک خواہشات کا اظہار کیا۔

سری لنکن سلیکٹرز نے نئے ٹیسٹ کپتان کے نام کا اعلان تاحال نہیں کیا۔ تاہم وائٹ بال ٹیم کے کپتان کوشل مینڈس ان کھلاڑیوں میں شامل ہیں جنہیں ٹیسٹ ٹیم کی قیادت کے لیے زیر غور لایا جا سکتا ہے۔

دھننجایا ڈی سلوا کی قیادت میں سری لنکا نے 18 ٹیسٹ میچز کھیلے، جن میں 7 میں کامیابی، 8 میں شکست جبکہ 3 میچز ڈرا ہوئے۔

ان کی کپتانی کا بہترین سال 2024 رہا، جب سری لنکا نے بنگلادیش کے خلاف ٹیسٹ سیریز 0-2 سے جیتی، دی اوول میں کامیابی حاصل کی اور نیوزی لینڈ کے خلاف ہوم سیریز بھی 0-2 سے اپنے نام کی۔

تاہم 2024 کے اختتام اور 2025 کے آغاز میں سری لنکا کو جنوبی افریقا کے خلاف بیرونِ ملک اور آسٹریلیا کے خلاف ہوم سیریز میں مسلسل 4 ٹیسٹ میچز میں شکست کا سامنا کرنا پڑا۔

دھننجایا ڈی سلوا کا استعفیٰ سری لنکن مردوں کی ٹیم کی قیادت اور انتظامی ڈھانچے میں ہونے والی متعدد تبدیلیوں کے دوران سامنے آیا ہے۔