ترسیلات زر میں ریکارڈ اضافے سے پاکستان کا کرنٹ اکاؤنٹ سرپلس، مئی میں 45 کروڑ 90 لاکھ ڈالر زائد

کراچی: درآمدات میں کمی اور بیرون ملک مقیم پاکستانیوں کی جانب سے ترسیلات زر میں ریکارڈ اضافے کے باعث پاکستان کا کرنٹ اکاؤنٹ دوبارہ سرپلس ہو گیا ہے۔

اسٹیٹ بینک آف پاکستان کی جانب سے جاری کردہ اعداد و شمار کے مطابق مئی 2026 میں ملک کا کرنٹ اکاؤنٹ 45 کروڑ 90 لاکھ ڈالر سرپلس رہا، جبکہ اپریل 2026 میں کرنٹ اکاؤنٹ 27 کروڑ 60 لاکھ ڈالر خسارے میں تھا۔

رپورٹ کے مطابق اپریل سے قبل مسلسل تین ماہ تک پاکستان کا کرنٹ اکاؤنٹ سرپلس رہا تھا۔ رواں مالی سال کے ابتدائی 11 ماہ کے دوران مجموعی طور پر کرنٹ اکاؤنٹ 25 کروڑ 50 لاکھ ڈالر سرپلس ریکارڈ کیا گیا۔

معاشی ماہرین کا کہنا ہے کہ درآمدات میں محتاط کمی اور ترسیلات زر میں نمایاں اضافے نے بیرونی شعبے کی کارکردگی کو بہتر بنایا ہے، جس کے نتیجے میں کرنٹ اکاؤنٹ مثبت سطح پر برقرار رہا۔

اعداد و شمار کے مطابق پاکستان نے مئی کے دوران 5.6 ارب ڈالر مالیت کی درآمدات کیں جبکہ برآمدات کا حجم 2.3 ارب ڈالر رہا۔ اسٹیٹ بینک کے مطابق مالی سال کے پہلے 11 ماہ میں مجموعی برآمدات 29.75 ارب ڈالر تک پہنچ گئیں۔

رپورٹ میں بتایا گیا ہے کہ مئی کے دوران ورکرز ترسیلات زر نے ریکارڈ سطح حاصل کی، جس کے باعث بیرونی کھاتوں میں نمایاں بہتری آئی۔ مئی 2026 میں بیرون ملک پاکستانیوں نے 4 ارب 30 کروڑ ڈالر وطن بھیجے، جو کسی بھی ایک ماہ میں موصول ہونے والی سب سے بڑی رقم ہے۔

اسٹیٹ بینک کے مطابق مئی میں ترسیلات زر میں ماہانہ بنیادوں پر 20.2 فیصد جبکہ سالانہ بنیادوں پر 15.4 فیصد اضافہ ریکارڈ کیا گیا۔ رواں مالی سال کے پہلے 11 ماہ میں مجموعی ترسیلات زر 38 ارب 10 کروڑ ڈالر تک پہنچ گئیں، جو گزشتہ مالی سال کی اسی مدت کے 34.9 ارب ڈالر کے مقابلے میں 9.2 فیصد زیادہ ہیں۔

ماہرین کے مطابق ترسیلات زر میں مسلسل اضافہ، برآمدات میں استحکام اور درآمدات پر کنٹرول پاکستان کی بیرونی مالی پوزیشن کو مضبوط بنانے میں اہم کردار ادا کر رہے ہیں، جس سے زرمبادلہ کے ذخائر اور مجموعی معاشی استحکام کو بھی تقویت ملنے کی توقع ہے۔