شریعت سے متعلق متنازع پوسٹ، مسلم رہنماؤں کا شدید احتجاج

بالٹی مور: بالٹی مور کاؤنٹی بورڈ آف ایجوکیشن کی رکن میگی لِٹز ڈومانوسکی کی جانب سے شریعت سے متعلق ایک متنازع کارٹون شیئر کرنے پر مسلم کمیونٹی اور شہری حقوق کے حلقوں نے شدید ردعمل کا اظہار کیا ہے۔

ڈومانوسکی نے فیس بک پر ایک کارٹون شیئر کیا جس میں MAGA اور خواتین کے حقوق کو شریعت کے حوالے سے جوڑا گیا، جبکہ ساتھ “Not wrong” لکھ کر اس پیغام کی حمایت کی۔

مسلم شہری حقوق کی تنظیم CAIR Maryland نے پوسٹ فوری طور پر حذف کرنے، عوامی معذرت کرنے اور مسلم طلبہ و خاندانوں کے احترام کا عہد کرنے کا مطالبہ کیا ہے۔ تنظیم نے مطالبات پورے نہ ہونے کی صورت میں ڈومانوسکی سے استعفے کا بھی مطالبہ کیا۔

بالٹی مور کاؤنٹی کی منتخب ڈیموکریٹک رہنما شازیہ شاہ نے بھی پوسٹ پر تشویش کا اظہار کیا ہے۔

مسلم رہنماؤں کا کہنا ہے کہ عوامی اور تعلیمی عہدوں پر فائز افراد کو مذہب اور ثقافت سے متعلق حساس معاملات میں ذمہ دارانہ زبان استعمال کرنی چاہیے، جبکہ ناقدین کے مطابق متنازع پوسٹ نے امریکا میں اسلام، مذہبی آزادی اور سیاسی اظہار سے متعلق نئی بحث چھیڑ دی ہے۔