سنیتا آہوجا نے گووندا سے طلاق کا مقدمہ واپس لے لیا، جوڑے میں صلح کی تصدیق

ممبئی: بالی ووڈ اداکار گووندا کی اہلیہ سنیتا آہوجا نے شوہر سے طلاق کا مقدمہ واپس لے لیا ہے۔ گووندا کی ٹیم نے بھی اس پیش رفت کی تصدیق کردی ہے۔

بھارتی میڈیا رپورٹس کے مطابق سنیتا آہوجا ممبئی کی فیملی کورٹ پہنچیں، جہاں انہیں اپنے بیٹے یشوردھن آہوجا کے ہمراہ دیکھا گیا۔ عدالت آمد کے بعد گووندا کے منیجر ششی سنہا نے تصدیق کی کہ سنیتا نے اپنا طلاق کا مقدمہ واپس لے لیا ہے۔

پاپارازی کی جانب سے عدالت آنے کی وجہ پوچھے جانے پر سنیتا آہوجا نے مسکراتے ہوئے جواب دیا، ’’برتھ ڈے منانے آئی تھی۔‘‘

گووندا کے منیجر ششی سنہا نے کہا کہ لوگوں کو پریشان ہونے کی ضرورت نہیں، سنیتا نے اپنا کیس واپس لے لیا ہے اور یہ خوشی کی بات ہے۔ ان کے مطابق عدالت میں سنیتا کے قدرے سخت رویے کو دیکھ کر لوگوں نے اندازہ لگایا کہ شاید دونوں کے درمیان کوئی مسئلہ پیدا ہوگیا ہے، تاہم اب جوڑے کے درمیان معاملات بہتر ہیں۔

رپورٹس کے مطابق سنیتا آہوجا نے 5 دسمبر 2024 کو ہندو میرج ایکٹ کے تحت طلاق کی درخواست دائر کی تھی، جس میں مبینہ بے وفائی، بدسلوکی اور علیحدگی کو بنیاد بنایا گیا تھا۔

گووندا اور سنیتا آہوجا کئی دہائیوں سے ازدواجی رشتے میں ہیں اور ان کے دو بچے، ٹینا آہوجا اور یشوردھن آہوجا ہیں۔ طلاق کا مقدمہ واپس لیے جانے کے بعد دونوں کے درمیان تعلقات کے حوالے سے سامنے آنے والی قیاس آرائیوں میں بھی کمی آنے کی توقع ہے۔