اردوان کا پاکستان پر بھرپور اعتماد، امن، ترقی اور خوشحالی کے اقدامات کو قابلِ ستائش قرار دے دیا

استنبول: ترکیہ کے صدر رجب طیب اردوان نے پاکستان کے امن، ترقی اور خوشحالی کے لیے کیے جانے والے اقدامات کو قابلِ ستائش قرار دیتے ہوئے کہا ہے کہ ترکیہ ہر شعبے میں پاکستان کی بھرپور حمایت جاری رکھے گا۔

استنبول میں وزیراعظم شہباز شریف کے ہمراہ مشترکہ پریس کانفرنس سے خطاب کرتے ہوئے صدر رجب طیب اردوان نے پاکستانی وفد کا گرمجوشی سے خیرمقدم کیا اور کہا کہ پاکستان اور ترکیہ کے تعلقات تاریخی، برادرانہ اور مضبوط بنیادوں پر استوار ہیں۔

انہوں نے کہا کہ دونوں رہنماؤں کے درمیان ہونے والے مذاکرات میں دوطرفہ تعاون کے مختلف شعبوں پر تفصیلی تبادلۂ خیال کیا گیا، جبکہ موجودہ تعلقات کی رفتار پر اطمینان کا اظہار کرتے ہوئے انہیں مزید وسعت دینے کے عزم کا اعادہ کیا گیا۔

صدر اردوان نے کہا کہ پاکستان اور ترکیہ ہمیشہ ایک دوسرے کے ساتھ کھڑے رہے ہیں اور آئندہ بھی ہر مشکل وقت میں باہمی تعاون اور یکجہتی کا یہ سلسلہ جاری رہے گا۔

انہوں نے اسلام آباد مفاہمتی یادداشت (ایم او یو) کو عالمی امن کے لیے اہم پیش رفت قرار دیتے ہوئے اس کا خیرمقدم کیا اور کہا کہ ایسے اقدامات خطے میں امن اور استحکام کے فروغ میں اہم کردار ادا کر سکتے ہیں۔

ترکیہ کے صدر نے پاکستان کے امن، ترقی اور خوشحالی کے لیے کی جانے والی کوششوں کو سراہتے ہوئے یقین دہانی کرائی کہ ترکیہ سیاسی، اقتصادی، تجارتی اور دفاعی سمیت ہر شعبے میں پاکستان کے ساتھ تعاون کو مزید مضبوط بنائے گا۔

اپنی گفتگو میں انہوں نے اس بات پر بھی زور دیا کہ خطے میں پائیدار امن اور استحکام کے لیے مشترکہ کوششیں ناگزیر ہیں، جبکہ معاہدوں کو سبوتاژ کرنے کی کسی بھی کوشش، خصوصاً اسرائیلی جارحیت کے تناظر میں ہونے والی پیش رفت، پر گہری نظر رکھی جا رہی ہے۔

مشترکہ پریس کانفرنس کے اختتام پر پاکستان اور ترکیہ نے اس عزم کا اعادہ کیا کہ دونوں برادر ممالک کے درمیان سیاسی، معاشی، تجارتی اور دفاعی تعاون کو مزید فروغ دیا جائے گا تاکہ خطے میں امن، ترقی اور خوشحالی کے مشترکہ اہداف حاصل کیے جا سکیں۔