امریکی کانگریس ویمن کا پاکستانی کمیونٹی کو تعاون کا یقین، امیگریشن مسائل میں مدد کی پیشکش

امریکی کانگریس کی رکن اپریل میک کلین ڈیلینی سے بزنس کمیونٹی کے نمائندوں کی خصوصی ملاقات اور میٹ اینڈ گریٹ کا انعقاد کیا گیا، جس میں کاروباری شخصیات اور کمیونٹی رہنماؤں کی بڑی تعداد نے شرکت کی۔

ملاقات میں مہنگائی، صحت کے بڑھتے اخراجات، سستی رہائش، امیگریشن، سوشل سیکیورٹی اور روزمرہ اشیائے ضروریہ کی قیمتوں سمیت عوام کو درپیش اہم مسائل پر تفصیلی تبادلہ خیال کیا گیا۔

اس موقع پر کانگریس ویمن اپریل میک کلین ڈیلینی نے کہا کہ وہ صحت کی سہولیات کو مزید سستا اور عام شہریوں کی دسترس میں لانے کے لیے کام کریں گی۔ انہوں نے کم آمدنی اور متوسط طبقے کے خاندانوں کے لیے سستے گھروں کی فراہمی کو بھی اہم قرار دیا۔

امیگریشن کے مسائل پر گفتگو کرتے ہوئے انہوں نے یقین دہانی کرائی کہ متاثرہ افراد کے معاملات متعلقہ وفاقی اداروں کے سامنے اٹھانے اور ان کے حل میں مدد فراہم کرنے کی کوشش کی جائے گی۔ ان کے کانگریشنل آفس کی جانب سے امیگریشن، سوشل سیکیورٹی، میڈیکیئر اور آئی آر ایس سے متعلق معاملات میں بھی معاونت فراہم کی جاتی ہے۔

ملاقات میں بزنس کمیونٹی نے اپنے مسائل براہ راست کانگریس ویمن کے سامنے رکھے اور عوامی سہولیات، کاروباری مشکلات اور معاشی مسائل کے حل کے لیے مؤثر اقدامات کی ضرورت پر زور دیا۔