میری لینڈ: عید کی تعطیلات اسکول کیلنڈر میں شامل کرنے کی منظوری

امریکی ریاست میری لینڈ میں مسلم کمیونٹی کی بڑی کامیابی، عیدالفطر اور عیدالاضحیٰ کی تعطیلات اسکولوں کے سرکاری کیلنڈر میں شامل کرنے کی منظوری دے دی گئی۔

میری لینڈ میں مسلم کمیونٹی کے مسلسل مطالبے اور جدوجہد کے بعد عید کی تعطیلات کو اسکولوں کے سرکاری کیلنڈر کا حصہ بنانے کے حوالے سے اہم پیش رفت سامنے آئی ہے۔

بورڈ آف ایجوکیشن کے اجلاس میں اس معاملے پر ووٹنگ ہوئی، جس میں آٹھ ارکان نے فیصلے کی حمایت جبکہ دو نے مخالفت میں ووٹ دیا۔

فیصلے کے تحت آئندہ عیدالفطر اور عیدالاضحیٰ کی تعطیلات اسکولوں کے باقاعدہ تعلیمی کیلنڈر میں شامل کی جائیں گی۔ اس اقدام کو دیگر مذاہب کے اہم مذہبی تہواروں کے احترام اور مذہبی مساوات کے فروغ کی جانب ایک اہم پیش رفت قرار دیا جا رہا ہے۔

اس موقع پر مسلم طالبات ماہ نور عباسی اور حفصہ عامر نے بھی اپنے خیالات کا اظہار کرتے ہوئے کہا کہ عید مسلمانوں کا ایک اہم مذہبی تہوار ہے، جس پر بچے اپنے خاندانوں کے ساتھ مذہبی تقریبات میں شرکت کرتے ہیں۔

طالبات کے مطابق عید کے روز اسکول کھلے ہونے کی صورت میں مسلم طلبہ کو غیر حاضر رہنا پڑتا ہے، جس سے ان کی حاضری اور تعلیمی کارکردگی متاثر ہونے کا خدشہ ہوتا ہے۔

مسلم کمیونٹی نے مطالبہ کیا کہ عید کے موقع پر غیر حاضر ہونے والے طلبہ کی چھٹی کو غیر مؤثر حاضری شمار کیا جائے تاکہ انہیں تعلیمی نقصان کا سامنا نہ کرنا پڑے۔

اس جدوجہد میں ڈیموکریٹ رہنما شازیہ شاہ نے بھی مسلم کمیونٹی کے مطالبے کی بھرپور حمایت کی اور متعلقہ تعلیمی حکام کے سامنے اس معاملے کو مؤثر انداز میں اجاگر کرنے میں اہم کردار ادا کیا۔

بورڈ آف ایجوکیشن کے اس فیصلے پر مسلم کمیونٹی کے رہنماؤں، والدین اور طلبہ نے خوشی کا اظہار کرتے ہوئے اسے اجتماعی جدوجہد اور جمہوری عمل کی کامیابی قرار دیا ہے۔

کمیونٹی رہنماؤں کا کہنا ہے کہ یہ فیصلہ نہ صرف مسلم طلبہ کے مذہبی حقوق کے احترام کی جانب اہم قدم ہے بلکہ امریکہ میں مذہبی رواداری، مساوات اور مختلف ثقافتوں کے باہمی احترام کو فروغ دینے میں بھی مددگار ثابت ہوگا۔