مکہ مشترکہ دفاعی معاہدہ: استنبول میں پاکستان، ترکیہ اور سعودی عرب کا پہلا سہ ملکی اجلاس

استنبول: پاکستان، ترکیہ اور سعودی عرب کے درمیان مکہ مشترکہ دفاعی معاہدے کے تحت قائم سہ ملکی کمیٹی کا پہلا اہم اجلاس استنبول میں شروع ہو گیا، جس میں دفاعی تعاون، علاقائی سلامتی اور مشترکہ دفاعی صلاحیتوں کو مضبوط بنانے کے روڈ میپ پر مشاورت کی جا رہی ہے۔

اجلاس میں پاکستان کی جانب سے نائب وزیراعظم و وزیر خارجہ اسحاق ڈار، وزیر دفاع خواجہ محمد آصف اور چیف آف ڈیفنس فورسز فیلڈ مارشل سید عاصم منیر شریک ہیں۔

ترکیہ کی نمائندگی وزیر خارجہ حاقان فیدان، وزیر قومی دفاع یشار گیولر اور چیف آف جنرل اسٹاف جنرل سلچوق بائر اکتار اولو کر رہے ہیں، جبکہ سعودی عرب کی جانب سے وزیر خارجہ شہزادہ فیصل بن فرحان، وزیر دفاع شہزادہ خالد بن سلمان اور چیف آف جنرل اسٹاف جنرل فیاض بن حامد الرویلی اجلاس میں شریک ہیں۔

سہ ملکی اجلاس میں پاکستان، ترکیہ اور سعودی عرب کے درمیان دفاعی اور سکیورٹی تعاون کو مزید مؤثر اور منظم بنانے کے مختلف پہلوؤں پر غور کیا جائے گا۔ ذرائع کے مطابق تینوں ممالک عالمی اور علاقائی سلامتی کی بدلتی ہوئی صورتحال کے تناظر میں مشترکہ حکمت عملی اور دفاعی صلاحیتوں میں اضافے کے امکانات کا جائزہ لے رہے ہیں۔

اجلاس کے دوران دفاعی صنعت میں مشترکہ پیداوار، جدید ٹیکنالوجی کے تبادلے اور دفاعی شعبے میں وسیع تعاون کے معاملات بھی زیر غور آئیں گے۔ اس پیش رفت کو تینوں ممالک کے درمیان اسٹریٹجک دفاعی شراکت داری کو ادارہ جاتی شکل دینے کی اہم کوشش قرار دیا جا رہا ہے۔

اس سے قبل ترکیہ کے وزیر قومی دفاع یشار گیولر نے پاکستان کے وزیر دفاع خواجہ محمد آصف سے ملاقات کی، جس میں دوطرفہ تعلقات اور دفاعی تعاون پر تبادلہ خیال کیا گیا۔

ترک وزیر قومی دفاع نے چیف آف ڈیفنس فورسز فیلڈ مارشل سید عاصم منیر سے بھی ملاقات کی۔ یہ ملاقات مکہ مشترکہ دفاعی معاہدے کے تحت قائم اسٹریٹجک سیاسی و دفاعی کمیٹی کے افتتاحی اجلاس سے قبل دوطرفہ روابط کے سلسلے میں ہوئی۔

دوسری جانب نائب وزیراعظم اسحاق ڈار نے ترک وزیر خارجہ حاقان فیدان سے ملاقات میں علاقائی امن و استحکام کے لیے پاکستان کی دیرپا کوششیں جاری رکھنے کے عزم کا اعادہ کیا۔ دونوں رہنماؤں نے پاکستان اور ترکیہ کے تعلقات کے مسلسل استحکام اور توسیع پر اطمینان کا اظہار کیا۔

استنبول کے دورے کے دوران نائب وزیراعظم اسحاق ڈار نے حضرت ابو ایوب انصاریؓ کے مزار پر بھی حاضری دی، عقیدت و احترام کا اظہار کیا اور پاکستان کی ترقی و خوشحالی، عوام کے امن اور امت مسلمہ کے اتحاد کے لیے دعا کی۔

وزیراعظم شہباز شریف نے اس موقع پر کہا کہ پاکستان اور ترکیہ کی اسٹریٹجک شراکت داری مشترکہ خوش حالی اور سلامتی کی ضامن ہے۔ انہوں نے کہا کہ مکہ معاہدے نے دونوں ممالک کے اسٹریٹجک بھائی چارے کی مزید تصدیق کی ہے اور یہ معاہدہ پاکستان اور ترکیہ کو سعودی عرب کے ساتھ مضبوطی سے جوڑتے ہوئے مشترکہ تحفظ اور دفاعی قوت کے نئے امکانات پیدا کرتا ہے۔