امریکا وسط مدتی انتخابات سے قبل ایران پر حملہ نہیں کرے گا: ٹرمپ

واشنگٹن: امریکی صدر ڈونلڈ ٹرمپ کا کہنا ہے کہ ایران کے ساتھ مفید اور نتیجہ خیز مذاکرات جاری ہیں، تاہم ایران پر عائد ناکہ بندی برقرار رہے گی اور تہران کو کسی صورت جوہری ہتھیار حاصل نہیں کرنے دیا جائے گا۔

امریکی صدر ڈونلڈ ٹرمپ نے اعلان کیا ہے کہ امریکا 3 نومبر کو ہونے والے وسط مدتی انتخابات سے قبل ایران پر حملہ نہیں کرے گا۔ انہوں نے یہ بیان اپنے سوشل میڈیا پلیٹ فارم ٹروتھ سوشل پر جاری کیا، جس میں ایران کے ساتھ جاری مذاکرات اور خطے کی صورت حال سے متعلق اہم مؤقف پیش کیا۔

صدر ٹرمپ کے مطابق امریکا اور ایران کے درمیان مفید اور نتیجہ خیز مذاکرات جاری ہیں۔ ان کا کہنا تھا کہ ایران اس وقت معاشی اور فوجی لحاظ سے انتہائی خراب حالت میں ہے۔

امریکی صدر نے واضح کیا کہ ایران پر عائد ناکہ بندی مکمل طور پر برقرار رہے گی۔ انہوں نے آبنائے ہرمز سے تیل کی ترسیل کا ذکر کرتے ہوئے دعویٰ کیا کہ گزشتہ رات اس اہم بحری گزرگاہ سے 2 کروڑ 20 لاکھ بیرل تیل گزرا، تاہم اس تیل میں ایک بیرل بھی ایسا نہیں تھا جو ایران سے آیا ہو یا ایران کے لیے جا رہا ہو۔

ڈونلڈ ٹرمپ نے اپنے بیان میں ایران کے جوہری پروگرام پر بھی سخت مؤقف دہرایا۔ ان کا کہنا تھا کہ ایران کو کسی صورت جوہری ہتھیار حاصل نہیں کرنے دیا جائے گا۔

صدر ٹرمپ کے اس اعلان کو ایران کے ساتھ جاری سفارتی رابطوں اور امریکی پالیسی کے تناظر میں اہم قرار دیا جا رہا ہے۔ تاہم، مذاکرات کی پیش رفت اور ایران سے متعلق آئندہ امریکی اقدامات کے بارے میں صورت حال مزید واضح ہونا باقی ہے۔