جی سیون اجلاس: مودی ٹرمپ سے ملاقات میں پرچی تھامے بیٹھے رہے، امریکا نے دفاعی تعاون کی یقین دہانی کرا دی

(پیرس) فرانس میں جاری جی سیون سربراہی اجلاس کی سائیڈ لائن پر امریکی صدر ڈونلڈ ٹرمپ اور بھارتی وزیراعظم نریندر مودی کے درمیان اہم ملاقات ہوئی، جس میں دوطرفہ تعلقات، تجارتی تعاون اور دفاعی امور پر تبادلہ خیال کیا گیا۔

ملاقات کے دوران نریندر مودی ہاتھ میں ایک پرچی تھامے نظر آئے، جس کی تصاویر اور ویڈیوز سوشل میڈیا پر بھی زیرِ بحث رہیں۔

ملاقات کے بعد میڈیا سے گفتگو کرتے ہوئے امریکی صدر ڈونلڈ ٹرمپ نے کہا کہ ان کی بھارتی وزیراعظم نریندر مودی کے ساتھ انتہائی مثبت اور تعمیری گفتگو ہوئی ہے۔ انہوں نے بتایا کہ امریکا اور بھارت کے درمیان تجارتی معاہدوں پر کام جاری ہے اور دونوں ممالک اقتصادی تعاون کو مزید وسعت دینے کے خواہاں ہیں۔

ٹرمپ نے بھارت کے دفاعی تعاون کے حوالے سے بھی اہم بیان دیتے ہوئے کہا کہ امریکا بھارت کے ساتھ کھڑا ہے اور ضرورت پڑنے پر اس کی مدد کرے گا۔

امریکی صدر نے مودی کی جانب اشارہ کرتے ہوئے کہا، ’’اگر ان پر حملہ ہوا تو ہم ان کی مدد کے لیے موجود ہوں گے۔‘‘

انہوں نے مزید کہا، ’’اگر کوئی اس شخص (مودی) پر حملہ کرے گا تو ہم وہاں ہوں گے۔‘‘ تاہم ٹرمپ نے یہ بھی واضح کیا کہ مستقبل میں قیادت کی تبدیلی کی صورت میں حالات اور پالیسیوں میں فرق آ سکتا ہے۔