ٹرمپ کا ندال حسان کی سزائے موت براہِ راست نشر کرنے کے منصوبے پر شکوک کا اظہار

واشنگٹن: امریکی صدر ڈونلڈ ٹرمپ نے فورٹ ہڈ فوجی اڈے پر 2009 میں ہونے والے مہلک حملے کے مجرم ندال حسان کی سزائے موت براہ راست نشر کرنے کے منصوبے پر شکوک کا اظہار کیا ہے۔ اس منصوبے کو امریکی سیاست دانوں اور انسانی حقوق کی تنظیموں کی جانب سے مخالفت کا سامنا ہے۔

فرانسیسی خبر رساں ادارے اے ایف پی کے مطابق ندال حسان کو 3 دسمبر کو ٹیکساس کے فورٹ ہڈ فوجی اڈے پر فائرنگ اسکواڈ کے ذریعے سزائے موت دیے جانے کا شیڈول ہے۔ اگر اس پر عمل درآمد ہوا تو یہ 1945 کے بعد امریکی فوج میں فائرنگ اسکواڈ کے ذریعے دی جانے والی پہلی سزائے موت ہوگی۔

اس سے قبل پینٹاگون کے ایک اہلکار نے اے ایف پی کو بتایا تھا کہ سزائے موت براہ راست نشر کی جائے گی۔ امریکی وزیر دفاع پیٹ ہیگسیتھ بھی کہہ چکے ہیں کہ لوگوں کو یہ کارروائی دیکھنے کا موقع فراہم کیا جائے گا۔

تاہم جمعے کو ڈونلڈ ٹرمپ نے کہا کہ اس حوالے سے حکام فیصلہ کر رہے ہیں، لیکن مجرم کو سزائے موت ضرور دی جائے گی۔ ٹرمپ نے کہا کہ انہیں اس بات سے فرق نہیں پڑتا کہ سزائے موت کس طریقے سے دی جاتی ہے، بشرطیکہ اس پر عمل ہو۔

امریکی نائب صدر جے ڈی وینس نے بھی کہا کہ انہیں معلوم نہیں کہ سزائے موت کی براہ راست نشریات واقعی ہوں گی یا نہیں۔ ان کا کہنا تھا کہ اگر اسے براہ راست دکھایا گیا تو وہ اسے نہیں دیکھیں گے۔

امریکی سیاست دانوں اور انسانی حقوق کی تنظیموں کی مخالفت

ریپبلکن رکن کانگریس آسٹن اسکاٹ نےندال حسان کو سزائے موت دینے کی حمایت کی، تاہم ان کا کہنا تھا کہ سزائے موت کی براہ راست نشریات وہ طرزِ عمل ہے جو جہادی گروہ اختیار کرتے ہیں، اور امریکہ کو اس سے بہتر مثال قائم کرنی چاہیے۔

ڈیموکریٹ سینیٹر مارک کیلی نے بھی کہا کہ مجرم کو انصاف کا سامنا کرنا چاہیے، لیکن عوام کے سامنے سزائے موت کی نشریات ایران اور طالبان جیسے طرزِ عمل سے مشابہ ہیں۔

اقوام متحدہ کے ہائی کمشنر برائے انسانی حقوق نے بھی اس منصوبے کی مذمت کرتے ہوئے کہا کہ سزائے موت کو براہ راست نشر کرنا عوامی پھانسی کے مترادف ہوگا اور تشدد کی مطلق ممانعت کی خلاف ورزی بن سکتا ہے۔

امریکی کیتھولک بشپ کانفرنس کے صدر آرچ بشپ پال کوکلے نے اسے موت کی ثقافت کو فروغ دینے والا اقدام قرار دیتے ہوئے منصوبے پر نظرثانی کا مطالبہ کیا۔

دوسری جانب ٹک ٹاک نے اے ایف پی کو بتایا کہ اس کی پالیسی میں گرافک تشدد اور کسی شخص کو گولی مارنے جیسے مناظر کی اجازت نہیں ہے۔ یوٹیوب، میٹا اور ایکس نے اس حوالے سے فوری طور پر کوئی جواب نہیں دیا کہ آیا وہ سزائے موت کی نشریات کی اجازت دیں گے۔

فورٹ ہڈ حملہ: 13 افراد ہلاک، 30 زخمی

ندال حسان نے 2009 میں ٹیکساس کے فورٹ ہڈ فوجی اڈے پر فائرنگ کی تھی، جس میں 13 افراد ہلاک اور 30 زخمی ہوئے تھے۔ ہلاک ہونے والوں میں 12 فوجی اہلکار شامل تھے۔ حملے کے دوران ایک سویلین پولیس افسر کی فائرنگ سے ندال حسان زخمی ہوا اور اس کے جسم کا نچلا حصہ مفلوج ہوگیا۔

2013 میں فوجی جیوری نے ندال حسان کو سزائے موت سنائی تھی۔ مقدمے کے دوران اس نے اپنا دفاع خود کیا، تاہم کوئی گواہ پیش نہیں کیا اور نہ ہی الزامات کی تردید کی۔

عدالتی کارروائی میں یہ بات بھی سامنے آئی تھی کہ حسن عراق اور افغانستان میں امریکی فوجی کارروائیوں کا مخالف تھا اور اس نے القاعدہ سے وابستہ سمجھے جانے والے شدت پسند مذہبی رہنما انور العولقی سے آن لائن رابطہ کیا تھا۔ العولقی بعد میں یمن میں امریکی ڈرون حملے میں مارا گیا تھا۔

اے ایف پی کے مطابق امریکی فوج میں آخری مرتبہ 1961 میں جان بینیٹ کو پھانسی دی گئی تھی۔ ڈیتھ پینلٹی انفارمیشن سینٹر کے مطابق 1916 سے اب تک امریکی فوج میں 135 افراد کو سزائے موت دی جا چکی ہے۔

انسانی حقوق کی تنظیم ایمنسٹی انٹرنیشنل کے مطابق 2025 میں کم از کم 17 عوامی پھانسیوں کی اطلاعات سامنے آئی تھیں، جن میں افغانستان میں 6 اور ایران میں 11 پھانسیاں شامل تھیں۔ تنظیم کے نمائندے جسٹن مزولا نے کہا کہ سزائے موت انسانی حقوق کی خلاف ورزی ہے اور اسے براہ راست نشر کرنے سے اس کی سنگینی مزید بڑھ جائے گی۔