فیفا ورلڈ کپ: امریکا نے بوسنیا و ہرزیگووینا کو شکست دے کر پری کوارٹر فائنل میں جگہ بنا لی

فیفا ورلڈ کپ میں امریکا نے بوسنیا و ہرزیگووینا کو 0-2 سے شکست دے کر پری کوارٹر فائنل میں شاندار انداز سے جگہ بنا لی، جہاں اس کا مقابلہ 6 جولائی کو بیلجیم سے ہوگا۔

سانتا کلارا میں کھیلے گئے میچ میں امریکی ٹیم نے آغاز ہی سے جارحانہ کھیل پیش کیا اور بوسنیا و ہرزیگووینا کو دفاعی حکمت عملی اختیار کرنے پر مجبور کر دیا۔ کوچ موریسیو پوچیٹینو کی زیرِ قیادت امریکی ٹیم نے پورے مقابلے میں کھیل پر اپنی گرفت برقرار رکھی اور متعدد خطرناک مواقع بھی پیدا کیے۔

امریکا کو پہلی کامیابی 24 سالہ اسٹرائیکر فولارین بالوگن نے دلائی، جنہوں نے مالک ٹل مین کے ڈیفلیکٹ ہونے والے پاس کو گول میں تبدیل کرتے ہوئے اپنی ٹیم کو برتری دلا دی۔

دوسرے ہاف میں بالوگن طارق محمدیرووچ کے ساتھ ٹکراؤ کے دوران خطرناک فاؤل کے مرتکب قرار پائے۔ وی اے آر جائزے کے بعد ریفری نے انہیں ریڈ کارڈ دکھا کر میدان سے باہر بھیج دیا، جس کے بعد امریکا نے میچ کا باقی حصہ 10 کھلاڑیوں کے ساتھ کھیلا۔

ایک کھلاڑی کم ہونے کے باوجود امریکی ٹیم نے حوصلہ نہیں ہارا اور کھیل پر اپنا دباؤ برقرار رکھا۔ میچ کے آخری لمحات میں مالک ٹل مین نے شاندار فری کک پر گول کر کے امریکا کی برتری 0-2 کر دی، جس کے بعد بوسنیا و ہرزیگووینا کی واپسی کی تمام امیدیں ختم ہو گئیں۔

اس کامیابی کے ساتھ امریکا نے آخری 16 مرحلے کے لیے کوالیفائی کر لیا ہے، جہاں 6 جولائی کو سیئٹل میں اس کا مقابلہ بیلجیم سے ہوگا۔ اس میچ کی فاتح ٹیم کوارٹر فائنل میں جگہ بنائے گی۔