انڈر 19 ایشیا کپ فائنل: بھارت نے پاکستان کو آخری گیند پر ایک وکٹ سے ہرا کر ٹائٹل جیت لیا

عمان: انڈر 19 کرکٹ ایشیا کپ کے فائنل میں بھارت نے سنسنی خیز مقابلے کے بعد پاکستان کو ایک وکٹ سے شکست دے کر ٹائٹل اپنے نام کر لیا۔ بھارتی ٹیم نے پاکستان کی جانب سے دیا گیا 338 رنز کا ہدف آخری گیند پر 9 وکٹوں کے نقصان پر حاصل کیا۔

فائنل میں بھارتی بلے بازوں نے آخری گیند تک مقابلہ جاری رکھا اور ایک وکٹ سے کامیابی حاصل کرکے ایشیا کپ کی ٹرافی جیت لی۔

بھارت کی جانب سے لکشیا راجیش 80 رنز بنا کر نمایاں بلے باز رہے، جبکہ آریا ویر سہواگ نے 58 رنز کی اننگز کھیلی۔ وی کے ونیت نے 24 اور انوے ڈریوڈ نے 19 رنز بنائے۔ ارجن راجپوت 16، یشبردھن اور آرین ساوسانی 9، 9 رنز بنا کر آؤٹ ہوئے۔

اس سے قبل پاکستان نے ٹاس کے بعد پہلے بیٹنگ کرتے ہوئے مقررہ اوورز میں 337 رنز بنائے تھے اور بھارت کو جیت کے لیے 338 رنز کا ہدف دیا تھا۔

پاکستان کی جانب سے عثمان خان نے شاندار بیٹنگ کا مظاہرہ کرتے ہوئے 107 رنز کی سنچری اسکور کی اور ٹیم کے ٹاپ اسکورر رہے۔ عبدالقادر نے 80 جبکہ کپتان فرحان یوسف نے 63 رنز کی عمدہ اننگز کھیلی۔

دیگر بلے بازوں میں حیام خان نے 21، احمد حسین نے 17، نقاب شفیق نے 11 اور حمزہ ظہور نے 10 رنز بنائے۔

پاکستان کی جانب سے بڑا مجموعہ اسکور بورڈ پر سجانے کے باوجود بھارتی ٹیم نے آخری گیند پر ہدف حاصل کرلیا اور ایک وکٹ سے کامیابی کے ساتھ انڈر 19 ایشیا کپ کی ٹرافی اپنے نام کرلی۔