پرویز الٰہی سے لطیف کھوسہ کی اہم ملاقات، عمران خان سے ملاقات کی تفصیلات سے آگاہ کردیا، آئندہ حکمت عملی پر مشاورت

لاہور: پاکستان تحریک انصاف کے مرکزی صدر چودھری پرویز الٰہی سے پارٹی کے سینئر رہنما اور قانون دان سردار لطیف کھوسہ نے اہم ملاقات کی، جس میں ملکی سیاسی صورتحال، عمران خان سے ہونے والی حالیہ ملاقات اور پارٹی کی آئندہ حکمت عملی پر تبادلہ خیال کیا گیا۔

ملاقات کے دوران سردار لطیف کھوسہ نے چودھری پرویز الٰہی کو بانی پی ٹی آئی عمران خان سے اپنی حالیہ ملاقات کی تفصیلات سے آگاہ کیا۔ دونوں رہنماؤں نے ملک کی مجموعی سیاسی صورتحال اور موجودہ سیاسی ڈیڈ لاک کے خاتمے کے امکانات پر بھی گفتگو کی۔

اس موقع پر چودھری پرویز الٰہی نے کہا کہ عمران خان سے ہونے والی حالیہ ملاقات ایک اچھا اور خوش آئند اقدام ہے۔ خطے میں تیزی سے تبدیل ہوتے حالات کا تقاضا ہے کہ پاکستان کے اندر بھی سیاسی ڈیڈ لاک ختم ہونا چاہیے کیونکہ موجودہ صورتحال کسی کے مفاد میں نہیں ہے۔

انہوں نے کہا کہ سیاسی ملاقاتوں اور مشاورت کا یہ سلسلہ مستقبل میں بھی جاری رہنا چاہیے تاکہ ملک میں سیاسی معاملات کو آگے بڑھانے کے لیے سازگار ماحول پیدا ہو سکے۔

پرویز الٰہی کا کہنا تھا کہ سردار لطیف کھوسہ انتہائی تجربہ کار اور منجھے ہوئے سیاستدان ہیں، ان کی سیاسی بصیرت اور تجربہ پارٹی کے لیے اہمیت کا حامل ہے۔

ملاقات میں دونوں رہنماؤں نے تحریک انصاف کے آئندہ لائحہ عمل، سیاسی حکمت عملی اور مستقبل کے اقدامات کے حوالے سے بھی مشاورت کی۔