امریکی ریاست لوزیانا میں فائرنگ، 8 بچے جاں بحق، ملزم پولیس مقابلے میں ہلاک

(واشنگٹن) امریکی ریاست لوزیانا میں فائرنگ کے افسوسناک واقعے میں 8 بچے جاں بحق جبکہ متعدد افراد زخمی ہو گئے، ملزم پولیس مقابلے میں ہلاک ہو گیا۔

غیر ملکی خبر رساں ایجنسی کے مطابق فائرنگ کے واقعے میں جاں بحق ہونے والے بچوں کی عمریں ایک سال سے 14 سال کے درمیان بتائی گئی ہیں، جس کے باعث علاقے میں شدید خوف و ہراس پھیل گیا۔

رپورٹس کے مطابق واقعے میں مجموعی طور پر 10 افراد گولیوں کا نشانہ بنے۔ اطلاع ملنے پر پولیس اور ریسکیو ٹیمیں فوری طور پر موقع پر پہنچ گئیں اور زخمیوں کو قریبی اسپتال منتقل کیا گیا۔

پولیس حکام کا کہنا ہے کہ فائرنگ کے بعد ملزم فرار ہونے کی کوشش کر رہا تھا تاہم پولیس نے فوری کارروائی کرتے ہوئے اس کا تعاقب کیا اور مقابلے کے دوران ملزم ہلاک ہو گیا۔

حکام کے مطابق واقعے کی تحقیقات جاری ہیں جبکہ علاقے میں سکیورٹی مزید سخت کر دی گئی ہے۔ فائرنگ کے واقعے کے بعد مقامی آبادی میں خوف و ہراس پھیل گیا اور سکیورٹی اداروں نے علاقے کو گھیرے میں لے لیا۔