ٹرمپ کا بڑا اعلان، ایران کو ہتھیار فروخت کرنے والے ممالک پر 50 فیصد ٹیرف عائد

(واشنگٹن) امریکی صدر ڈونلڈ ٹرمپ نے سوشل میڈیا پر جاری بیان میں کہا کہ ایران کو ہتھیار فروخت کرنے والے ممالک پر امریکا کے ساتھ تجارت میں 50 فیصد ٹیرف عائد کیا جائے گا اور یہ اقدام فوری طور پر نافذ العمل ہوگا۔

ٹرمپ نے کہا کہ امریکا اور ایران کے درمیان جنگ بندی پر عملدرآمد شروع ہوچکا ہے اور امریکا کا پہلا جہاز بھی آبنائے ہرمز سے روانہ ہو چکا ہے، جو صورتحال میں بہتری کی علامت ہے۔

امریکی صدر نے مزید کہا کہ امریکا ایران کے ساتھ مل کر کام کرے گا اور ایران میں رجیم چینج ہو چکی ہے، جو امریکا کا اہم مقصد تھا۔ انہوں نے دعویٰ کیا کہ ایران میں مزید یورینیم کی افزودگی نہیں ہوگی۔

ڈونلڈ ٹرمپ کے مطابق زمین میں دفن افزودہ یورینیم کو ایران کے ساتھ مل کر نکالا جائے گا جبکہ افزودہ مواد کی سیٹلائٹ کے ذریعے نگرانی پہلے بھی ہو رہی تھی اور آئندہ بھی جاری رہے گی۔

انہوں نے مزید کہا کہ ایران کے ساتھ مذاکرات کے دوران 15 نکات میں سے بیشتر پر اتفاق ہو چکا ہے، جبکہ امریکا ایران پر عائد پابندیوں اور ٹیرف میں بھی نرمی کرے گا۔

تجزیہ کاروں کے مطابق ٹرمپ کے اس اعلان سے عالمی تجارت اور خطے کی صورتحال پر گہرے اثرات مرتب ہو سکتے ہیں، خصوصاً ان ممالک پر دباؤ بڑھے گا جو ایران کو دفاعی سامان فراہم کرتے ہیں۔