ایرانی بندرگاہوں کی ناکہ بندی سے متعلق امریکی صدر کا بیان براہِ راست اور سنگین اعتراف جرم ہے: ایرانی دفترِ خارجہ

(تہران) ایران کے دفتر خارجہ نےصدر ڈونلڈ ٹرمپ کے حالیہ بیان پر سخت ردعمل دیتے ہوئے اسے براہِ راست اور سنگین اعترافِ جرم قرار دیا ہے۔

ایرانی حکام کے مطابق امریکی صدر نے امریکا کی بحریہ کی جانب سے ناکہ بندی کے دوران کارروائیوں کو خود ہی “قزاقی” سے تشبیہ دی، جس پر تہران نے شدید اعتراض اٹھایا ہے۔

امریکی صدر ڈونلڈ ٹرمپ نےکہا تھا کہ ’امریکی بحریہ ایرانی بندرگاہوں کے محاصرے کے نفاذ کے لیے ’بحری قزاقوں کی طرح‘ عمل کر رہی ہے۔‘

ایرانی دفتر خارجہ کے ترجمان اسماعیل بقائی کا کہنا ہے کہ امریکی صدر نے ایرانی بحری جہازوں کی مبینہ غیرقانونی ضبطی کو کھلے عام قزاقی قرار دیتے ہوئے اس پر فخر کا اظہار کیا۔

انہوں نے کہا کہ یہ بیان محض الفاظ کی غلطی نہیں بلکہ بین الاقوامی بحری قوانین کی خلاف ورزیوں کا واضح اعتراف ہے، جو عالمی قوانین کے لیے ایک سنگین چیلنج ہے۔

ترجمان نے عالمی برادری، اقوام متحدہ کے رکن ممالک اور سیکریٹری جنرل سے مطالبہ کیا کہ وہ ایسی خلاف ورزیوں کے خلاف واضح اور دوٹوک مؤقف اختیار کریں اور انہیں معمول کا حصہ بننے سے روکیں۔

دوسری جانب مسعود پزشکیان نے اساتذہ کے عالمی دن کے موقع پر اپنے بیان میں کہا کہ ملک کے دفاع میں نظر آنے والی کامیابیاں ان اساتذہ کی مرہون منت ہیں جنہوں نے نئی نسل کو ایمان، قربانی اور وطن سے محبت کا درس دیا۔

تجزیہ کاروں کے مطابق اس بیان کے بعد ایران اور امریکا کے درمیان کشیدگی میں مزید اضافہ متوقع ہے، جبکہ عالمی سطح پر سفارتی دباؤ بھی بڑھ سکتا ہے۔