ٹرمپ کی ایران کو نئی دھمکی، شرائط نہ مانیں تو حملے مزید شدت اختیار کریں گے

(واشنگٹن) اپنے بیان میں ڈونلڈ ٹرمپ نے کہا کہ اگر ایران شرائط مان لیتا ہے تو جاری آپریشن "ایپک فیوری" فوری طور پر ختم کر دیا جائے گا اور خطے میں کشیدگی کم ہو سکتی ہے۔ انہوں نے یہ بھی عندیہ دیا کہ اس صورت میں آبنائے ہرمزمیں ایران سمیت تمام ممالک کو آزادانہ رسائی فراہم کی جائے گی۔

تاہم امریکی صدر نے خبردار کیا کہ معاہدہ نہ ہونے کی صورت میں امریکی کارروائیاں مزید سخت ہوں گی۔ انہوں نے ایران کو مخاطب کرتے ہوئے کہا کہ یہ ایک فیصلہ کن مرحلہ ہے اور عالمی امن کے لیے تہران کو ذمہ دارانہ رویہ اپنانا ہوگا۔

یاد رہے کہ آبنائے ہرمز عالمی سطح پر تیل کی ترسیل کے لیے نہایت اہم گزرگاہ ہے، جہاں کسی بھی قسم کی کشیدگی کے اثرات براہ راست عالمی معیشت پر پڑتے ہیں۔

قبل ازیں ڈونلڈ ٹرمپ نے اعلان کیا تھا کہ پاکستان سمیت دیگر ممالک کی درخواست اور ایران کے ساتھ جاری مذاکرات میں پیشرفت کے بعد "پروجیکٹ فریڈم" کو عارضی طور پر روک دیا گیا ہے، تاہم ایران کے خلاف ناکہ بندی بدستور برقرار رہے گی۔

وائٹ ہاؤس کے مطابق امریکا کو ایران کے خلاف کارروائیوں میں "اہم فوجی کامیابی" حاصل ہوئی ہے، جبکہ ایرانی نمائندوں کے ساتھ ایک جامع معاہدے کی جانب پیشرفت جاری ہے۔ غیر ملکی خبر ایجنسیوں کے مطابق دونوں ممالک ایک ممکنہ 14 نکاتی امن منصوبے کے قریب پہنچ چکے ہیں۔