ایران کی نئی تجاویز سامنے آگئیں، آبنائے ہرمز کھولنے کو مذاکرات کی پہلی شرط قرار

ایران کی جانب سے مذاکرات میں پیشرفت کے لیے نئی تجاویز سامنے آگئی ہیں، جنہوں نے سفارتی سطح پر ایک نئی بحث کو جنم دے دیا ہے۔

امریکی میڈیا رپورٹس کے مطابق یہ تجاویز پاکستان کے ذریعے امریکہ تک پہنچائی گئی ہیں۔ تجاویز میں کہا گیا ہے کہ سب سے پہلے آبنائے ہرمز کو کھولنے اور بحری ناکہ بندی ختم کرنے پر معاہدہ کیا جائے، جبکہ جوہری مذاکرات کو بعد کے مرحلے میں رکھا جائے۔

ذرائع کے مطابق وائٹ ہاوس حکام کا کہنا ہے کہ امریکہ صرف ایسے معاہدے میں دلچسپی رکھتا ہے جو ایران کو جوہری ہتھیار حاصل کرنے سے روکے۔

رپورٹس کے مطابق نئی تجاویز پر غور کے لیے امریکی صدر ڈونلڈ ٹرمپ کی زیر صدارت ایک اہم اجلاس متوقع ہے، جس میں امریکی حکام آئندہ حکمت عملی طے کریں گے۔

تاہم دونوں فریقین کے درمیان مذاکرات کی ترتیب پر اختلافات تاحال برقرار ہیں، جو کسی حتمی معاہدے کی راہ میں رکاوٹ بن سکتے ہیں۔

ماہرین کے مطابق اگر آبنائے ہرمز میں کشیدگی کم ہوتی ہے تو اس سے نہ صرف خطے میں استحکام آئے گا بلکہ عالمی معیشت پر بھی مثبت اثرات مرتب ہوں گے، کیونکہ یہ آبی گزرگاہ عالمی توانائی کی ترسیل کے لیے انتہائی اہم سمجھی جاتی ہے۔