پاکستان نے یو اے ای کو 3 ارب ڈالر واپس کرنے کے انتظامات مکمل کر لیے،

(اسلام آباد) پاکستان نے متحدہ عرب امارات کو 3 ارب ڈالر واپس کرنے کے انتظامات مکمل کر لیے ہیں، جبکہ زرمبادلہ ذخائر کو جون تک 18 ارب ڈالر تک بڑھانے کی حکمت عملی بھی تیار کر لی گئی ہے۔

ذرائع وزارت خزانہ کے مطابق یو اے ای کو 2 ارب ڈالر 17 اپریل کو ادا کیے جانے کا امکان ہے، جبکہ باقی ماندہ ایک ارب ڈالر 23 اپریل کو ادا کرنے کا پلان بنایا گیا ہے۔ ذرائع کے مطابق پاکستان 45 کروڑ ڈالر کا 30 سالہ پرانا قرض بھی واپس کر چکا ہے۔

ذرائع کا کہنا ہے کہ سعودی عرب کی جانب سے 3 ارب ڈالر کی اضافی مالی سہولت ملنے سے ادائیگیوں کے بعد پیدا ہونے والا خلا پر ہو جائے گا۔ اس اضافی ڈپازٹ کے بعد پاکستان کے لیے سعودی عرب کے ڈپازٹس کا حجم بڑھ کر 8 ارب ڈالر تک پہنچنے کا امکان ہے۔

ذرائع کے مطابق سعودی عرب کی جانب سے موخر ادائیگیوں پر تیل کی سہولت بھی جاری رہنے کا امکان ہے۔ موجودہ ایک ارب ڈالر کی آئل فیسلٹی ختم ہونے کے قریب ہے جبکہ سعودی عرب اس وقت پاکستان کو ماہانہ 10 کروڑ ڈالر کی تیل سہولت فراہم کر رہا ہے۔ رواں مالی سال میں ایک ارب ڈالر کی تیل سہولت کا تخمینہ لگایا گیا ہے۔

ذرائع کے مطابق عالمی مالیاتی فنڈ سے اگلے ماہ ایک ارب 21 کروڑ ڈالر کی قسط ملنے کا بھی امکان ہے۔ آئی ایم ایف اور پاکستان کے درمیان اسٹاف سطح کا معاہدہ ہو چکا ہے اور ایگزیکٹو بورڈ کی منظوری کے بعد رقم جاری کی جائے گی۔

وزارت خزانہ کے ذرائع کے مطابق پاکستان رواں سال کیپٹل مارکیٹ میں بانڈز بھی جاری کرے گا جبکہ چینی مارکیٹ میں پانڈا بانڈ جاری کرنے پر بھی کام جاری ہے۔ اس کے علاوہ کمرشل بینکوں سے قرض لینے کا منصوبہ بھی زیر غور ہے۔

ذرائع کے مطابق اس وقت پاکستان کے پاس سعودی عرب، چین اور متحدہ عرب امارات کے مجموعی طور پر 12 ارب ڈالر کے ڈپازٹس موجود ہیں، جن میں سعودی عرب کے 5 ارب، چین کے 4 ارب اور یو اے ای کے 3 ارب ڈالر شامل ہیں۔