ایم او یو میں واضح کیا گیا کہ ایران کے پاس جوہری ہتھیار نہیں ہوگا، ایران ڈیل کانگریس کو بھیجیں گے: ٹرمپ

(واشنگٹن / ابوظہبی) امریکی صدر ڈونلڈ ٹرمپ نے کہا ہے کہ ایران کے ساتھ طے پانے والی مفاہمتی یادداشت (ایم او یو) میں واضح طور پر درج ہے کہ ایران کے پاس جوہری ہتھیار نہیں ہوگا، جبکہ معاہدے کے اگلے مرحلے پر بھی جلد پیش رفت متوقع ہے۔

اماراتی صدر شیخ زید بن النہیان سے ملاقات کے بعد میڈیا سے گفتگو کرتے ہوئے ڈونلڈ ٹرمپ کا کہنا تھا کہ جمعہ تک آبنائے ہرمز کو مکمل طور پر کھول دیا جائے گا، جس سے عالمی توانائی منڈیوں میں استحکام آنے کی توقع ہے۔

انہوں نے بتایا کہ ایران کے ساتھ طے پانے والے معاہدے کا متن جلد باضابطہ انداز میں جاری کیا جائے گا، جبکہ ایران ڈیل کا دوسرا مرحلہ بھی جلد شروع ہونے کی امید ہے۔ ٹرمپ کے مطابق مفاہمتی یادداشت میں واضح طور پر اس بات کی ضمانت دی گئی ہے کہ ایران جوہری ہتھیار حاصل نہیں کرے گا۔

امریکی صدر نے مزید کہا کہ وہ ایران معاہدے پر جلد ایک تفصیلی نیوز کانفرنس کریں گے اور آئندہ چند روز میں میڈیا کے سامنے ایرانی مفاہمت کی مزید تفصیلات پیش کی جائیں گی۔ ان کا کہنا تھا کہ ایران ڈیل کو نظرثانی اور منظوری کے لیے امریکی کانگریس کو بھی بھیجا جائے گا۔

ڈونلڈ ٹرمپ نے اس امید کا اظہار بھی کیا کہ معاہدے کے نتیجے میں خطے میں کشیدگی میں کمی آئے گی اور خلیجی آبی گزرگاہوں میں بحری آمدورفت معمول پر آ جائے گی۔