حکومتی قرضوں میں اضافہ، ہر پاکستانی شہری 3 لاکھ 25 ہزار روپے سے زائد کا مقروض

اسلام آباد میں سینیٹ کی قائمہ کمیٹی برائے اقتصادی امور کے اجلاس میں انکشاف کیا گیا ہے کہ پاکستان پر مجموعی قرض 81 ہزار ارب روپے سے تجاوز کر گیا ہے، جس کے بعد ہر پاکستانی شہری اوسطاً 3 لاکھ 25 ہزار روپے سے زائد کا مقروض ہو گیا ہے۔

سینیٹ کی قائمہ کمیٹی اقتصادی امور کا اجلاس سینیٹر سیف اللہ ابڑو کی زیر صدارت اسلام آباد میں منعقد ہوا، جس میں آئی ایم ایف سمیت بیرونی اور مقامی قرضوں کی مجموعی صورتحال کا تفصیلی جائزہ لیا گیا۔

اقتصادی امور ڈویژن کے حکام نے کمیٹی کو بریفنگ دیتے ہوئے بتایا کہ پاکستان پر مجموعی قرض کا حجم 81 ہزار ارب روپے تک پہنچ چکا ہے۔ حکام کے مطابق مجموعی قرض میں سے 26 ہزار ارب روپے بیرونی قرض جبکہ 55 ہزار ارب روپے مقامی قرضوں پر مشتمل ہیں۔

اجلاس کو مزید بتایا گیا کہ ملک کی تقریباً 25 کروڑ آبادی کے حساب سے فی کس قرض کا بوجھ تقریباً 3 لاکھ 25 ہزار روپے بنتا ہے، جو ملکی معیشت پر بڑھتے ہوئے دباؤ کی نشاندہی کرتا ہے۔

اجلاس کے دوران قرضوں کے بڑھتے حجم اور اس کے معیشت پر ممکنہ اثرات پر بھی تفصیلی تبادلہ خیال کیا گیا۔ کمیٹی نے متعلقہ حکام سے قرضوں کے مؤثر انتظام اور مستقبل کی حکمت عملی سے متعلق مکمل رپورٹ طلب کر لی۔

کمیٹی اراکین نے زور دیا کہ قرضوں میں کمی اور معاشی استحکام کے لیے مؤثر اقدامات ناگزیر ہیں تاکہ ملکی معیشت کو درپیش چیلنجز سے نمٹا جا سکے۔