ایران کے پاس 48 گھنٹے، معاہدہ کرے یا آبنائے ہرمز کھول دے، ورنہ سخت کارروائی ہوگی: ٹرمپ

(واشنگٹن ) امریکی صدر نے اپنے سوشل میڈیا پلیٹ فارم ٹروتھ سوشل پر جاری بیان میں کہا کہ ایران کو پہلے 10 دن کی مہلت دی گئی تھی تاکہ وہ معاہدہ کرے یا آبنائے ہرمز کھول دے، تاہم اب یہ وقت ختم ہونے والا ہے اور صرف 48 گھنٹے باقی رہ گئے ہیں۔

ٹرمپ نے کہا کہ اگر اس مدت میں معاہدہ نہ ہوا تو ایران پر "قیامت ٹوٹ پڑے گی" اور امریکا سخت کارروائی کرنے سے گریز نہیں کرے گا۔

دوسری جانب امریکی صدر ڈونلڈ ٹرمپ نے ایک اور بیان میں کہا کہ امریکی ایف-16 طیارے کی تباہی سے ایران کے ساتھ جاری مذاکرات متاثر نہیں ہوں گے۔ انہوں نے کہا کہ موجودہ صورتحال جنگی نوعیت کی ہے اور جنگی حالات میں ایسے واقعات ہوتے رہتے ہیں۔

صدر ٹرمپ کا کہنا تھا کہ اس وقت یہ کہنا قبل از وقت ہوگا کہ لاپتا عملے کے رکن کو نقصان پہنچنے کی صورت میں امریکا کیا ردعمل دے گا، تاہم انہوں نے واضح کیا کہ امریکا صورتحال پر گہری نظر رکھے ہوئے ہے۔

امریکا اور ایران کے درمیان کشیدگی کے باعث خطے میں صورتحال مزید پیچیدہ ہوتی جا رہی ہے، جبکہ آبنائے ہرمز کے حوالے سے عالمی سطح پر تشویش میں اضافہ ہو رہا ہے۔