پاکستان کا ابھرتا آٹو سیکٹر عالمی کمپنیوں کی توجہ کا مرکز بن گیا

(اسلام آباد)معروف الیکٹرک وہیکل کمپنی بی وائی ڈی کی شمولیت کے بعد پاکستان کی آٹو انڈسٹری مزید مضبوط ہوئی ہے۔ ماہرین کے مطابق اس پیش رفت سے ملک میں جدید ٹیکنالوجی کی منتقلی، مقامی مینوفیکچرنگ اور ماحول دوست گاڑیوں کے فروغ کو تقویت ملے گی۔

اسی سلسلے میں لکی موٹر کارپوریشن نے چین کی عالمی شہرت یافتہ کمپنی گوانگژو آٹوموبائل گروپ (جی اے سی) کے ساتھ اسٹریٹجک شراکت داری قائم کر لی ہے، جسے پاکستان کے آٹو سیکٹر کیلئے اہم سنگ میل قرار دیا جا رہا ہے۔ اس معاہدے کے تحت پاکستان میں جدید گاڑیوں اور الیکٹرک وہیکل ٹیکنالوجی متعارف کرانے پر توجہ دی جائے گی۔

فورچون 500 میں شامل جی اے سی گروپ کی پاکستان میں شمولیت اس بات کی عکاس ہے کہ عالمی کمپنیاں پاکستان کی آٹو مارکیٹ پر اعتماد کر رہی ہیں۔ کمپنی نے پاکستان کو ایک ابھرتی ہوئی اور باصلاحیت مارکیٹ قرار دیتے ہوئے یہاں طویل مدتی سرمایہ کاری کے عزم کا اظہار کیا ہے۔

ماہرین کا کہنا ہے کہ اس شراکت داری سے نہ صرف الیکٹرک موبیلٹی کو فروغ ملے گا بلکہ مقامی صنعت کو تقویت، روزگار کے نئے مواقع اور معیشت میں بہتری بھی متوقع ہے۔

دوسری جانب مختلف غیر ملکی آٹو کمپنیوں کی پاکستان میں بڑھتی ہوئی دلچسپی اس بات کا اشارہ ہے کہ مستقبل میں پاکستان کا آٹو سیکٹر مزید ترقی کرے گا اور خطے میں ایک اہم مارکیٹ کے طور پر ابھرے گا۔