ایران دباؤ یا دھمکیوں کے آگے نہیں جھکے گا: مسعود پزشکیان

ایرانی خبر رساں ادارے کے مطابق پیر کے روز خطاب کرتے ہوئے مسعود پزشکیان نے کہا کہ دشمن ایران کو مختصر وقت میں گھٹنے ٹیکنے پر مجبور کرنے میں ناکام رہا، جس کے بعد اب ایرانی عوام اور حکام کے درمیان اختلافات پیدا کرنے کی کوششیں کی جا رہی ہیں۔

انہوں نے کہا کہ امریکی دباؤ سے ایران خوفزدہ نہیں ہوگا اور ملک اپنے اصولی مؤقف پر قائم رہے گا۔ ایرانی صدر کے مطابق امریکا نے جنگ مسلط کرکے بھی دیکھ لیا لیکن اسے ناکامی کے سوا کچھ حاصل نہیں ہوا۔

مسعود پزشکیان نے دعویٰ کیا کہ اب ایران کے اندر تقسیم پیدا کرنے کی کوششیں کی جا رہی ہیں، تاہم ایرانی قوم متحد ہے اور اپنی قیادت کے ساتھ کھڑی رہے گی۔

ایرانی صدر نے امریکا اور اسرائیل کو تنقید کا نشانہ بناتے ہوئے کہا کہ انسانی حقوق کے دعویدار ممالک بین الاقوامی قوانین کی خلاف ورزیوں پر خاموش ہیں۔ انہوں نے غزہ کی صورتحال کا حوالہ دیتے ہوئے کہا کہ عالمی برادری کا رویہ دوہرے معیار کی عکاسی کرتا ہے۔

انہوں نے مزید کہا کہ ایران اس وقت تک مذاکرات کی میز پر واپس نہیں آئے گا جب تک اس کے بنیادی مطالبات، خصوصاً بحری ناکہ بندی کے خاتمے سے متعلق شرائط، تسلیم نہیں کی جاتیں۔

مسعود پزشکیان نے واضح کیا کہ تہران واشنگٹن کے ساتھ تنازع کے حل کے لیے اپنے مطالبات سے پیچھے ہٹنے کا کوئی ارادہ نہیں رکھتا۔