سرگودھا: 7 سالہ بچی کے قتل کا مرکزی ملزم سی ٹی ڈی مقابلے میں ہلاک

(سرگودھا) پنجاب کے ضلع سرگودھا میں 7 سالہ معصوم بچی کو مبینہ زیادتی کے بعد بیدردی سے قتل کرنے والا مرکزی ملزم ارسلان انسدادِ دہشت گردی محکمے (CTD/CCD) کے ساتھ مبینہ مقابلے میں مارا گیا ہے۔

ذرائع کے مطابق یہ واقعہ اس وقت پیش آیا جب سی سی ڈی کی ٹیم مرکزی ملزم ارسلان کو آلہ قتل کی برآمدگی کے لیے لے جا رہی تھی۔ جھال چکیاں 3 پلی کے قریب ملزم کے مسلح ساتھیوں نے پولیس پارٹی پر اچانک فائرنگ کر دی اور اپنے ساتھی کو چھڑانے کی کوشش کی۔

پولیس ذرائع کا کہنا ہے کہ حملہ آوروں کی فائرنگ کے جواب میں سی سی ڈی ٹیم نے بھی پوزیشن سنبھالتے ہوئے جوابی فائرنگ کی۔ فائرنگ کے اس تبادلے میں مرکزی ملزم ارسلان اپنے ہی ساتھیوں کی گولیوں کا نشانہ بن کر ہلاک ہو گیا، جبکہ اس کے مسلح ساتھی اندھیرے کا فائدہ اٹھاتے ہوئے موقع سے فرار ہونے میں کامیاب ہو گئے۔ واقعے کے فوراً بعد علاقے میں پولیس کی بھاری نفری طلب کر لی گئی ہے اور فرار ملزمان کی گرفتاری کے لیے ناکہ بندی کر کے سرچ آپریشن شروع کر دیا گیا ہے۔