عامر خان اور گوری اسپرٹ کا شادی سے قبل بڑا فیصلہ، تقریب انتہائی سادگی سے ہوگی

ممبئی: بالی ووڈ کے معروف اداکار عامر خان اور ان کی شریکِ حیات بننے والی گوری اسپرٹ نے اپنی شادی کی تقریب کو انتہائی سادہ اور نجی رکھنے کا فیصلہ کیا ہے۔

بھارتی میڈیا رپورٹس کے مطابق عامر خان اور گوری اسپرٹ 5 جولائی کو ممبئی میں واقع عامر خان کی رہائش گاہ پر قریبی اہلِ خانہ اور چند قریبی دوستوں کی موجودگی میں شادی کی تقریب منعقد کریں گے۔

رپورٹس میں بتایا گیا ہے کہ دونوں نے شادی کے بعد کسی بڑے استقبالیہ (ریسیپشن) کا انعقاد نہ کرنے کا بھی فیصلہ کیا ہے۔ اس بار نہ کسی فائیو اسٹار ہوٹل میں شاندار تقریب ہوگی اور نہ ہی فلمی شخصیات کے لیے الگ دعوت کا اہتمام کیا جائے گا۔

حالیہ گفتگو میں عامر خان نے بھی اس فیصلے کی تصدیق کرتے ہوئے کہا کہ وہ اور گوری اسپرٹ اپنی زندگی کے اس اہم موقع کو سادگی اور نجی ماحول میں منانا چاہتے ہیں۔ ان کے مطابق وہ صرف اپنے قریبی عزیز و اقارب کی موجودگی میں شادی کی رسم ادا کریں گے۔

عامر خان نے اپنے مداحوں سے نئی زندگی کے آغاز کے لیے نیک تمناؤں اور دعاؤں کی درخواست بھی کی۔ ان کا کہنا تھا کہ وہ اس خوشی کو غیر ضروری نمود و نمائش کے بجائے خاندان کے ساتھ سادگی سے منانا چاہتے ہیں۔

بھارتی میڈیا کے مطابق شادی کی تمام تقریبات عامر خان کی ممبئی میں واقع رہائش گاہ تک محدود رہیں گی، جہاں صرف منتخب مہمانوں کو مدعو کیا جائے گا۔