عبدالعلیم خان کا آزاد کشمیر کے لیے بڑا اعلان، موٹروے، ایئرپورٹ، سیاحت اور زیرو کرپشن کا وعدہ

مظفرآباد: استحکام پاکستان پارٹی (آئی پی پی) کے صدر عبدالعلیم خان نے آزاد کشمیر کی ترقی کے لیے بڑے منصوبوں کا اعلان کرتے ہوئے کہا ہے کہ وادی میں موٹروے اور ایئرپورٹ تعمیر کیے جائیں گے، سیاحت کو فروغ دیا جائے گا اور آزاد کشمیر کے فیصلے آزاد کشمیر میں بیٹھ کر کیے جائیں گے۔

عبدالعلیم خان نے اپنے خطاب میں کہا کہ اگر آزاد کشمیر میں کرپشن ہوئی تو اس کی ذمہ داری وہ خود قبول کریں گے۔ انہوں نے واضح کیا کہ جو بھی کرپشن میں ملوث پایا گیا، وہ وزیر اپنے عہدے پر برقرار نہیں رہے گا۔

انہوں نے کہا کہ آزاد کشمیر کے عوام کو جدید انفراسٹرکچر، بہتر سفری سہولیات اور معاشی مواقع فراہم کیے جائیں گے تاکہ خطے میں سرمایہ کاری اور سیاحت کو فروغ مل سکے۔ ان کے مطابق آزاد کشمیر کے ہر بچے کو سو فیصد تعلیم کی سہولت فراہم کرنا بھی ان کی ترجیحات میں شامل ہے۔

گلگت بلتستان کی سیاسی صورتحال کا ذکر کرتے ہوئے عبدالعلیم خان نے کہا کہ بعض حلقے سوال اٹھاتے ہیں کہ آزاد امیدوار استحکام پاکستان پارٹی میں کیوں شامل ہوئے۔ ان کا کہنا تھا کہ یہ امیدوار پہلے دیگر بڑی سیاسی جماعتوں سے رابطے میں تھے، تاہم مناسب سیاسی مواقع نہ ملنے پر انہوں نے آئی پی پی کا انتخاب کیا۔

انہوں نے دعویٰ کیا کہ مسلم لیگ (ن) نے گلگت بلتستان میں اپوزیشن میں بیٹھنے کا مؤقف اختیار کیا، جبکہ پیپلز پارٹی نے بھی آزاد امیدواروں کو فوری سیاسی جگہ نہ دی۔ ان کے مطابق استحکام پاکستان پارٹی نے انہیں ترجیح دی، جس کے باعث وہ پارٹی میں شامل ہوئے۔

عبدالعلیم خان نے مزید کہا کہ آزاد کشمیر کے عوام ایک نئے سیاسی وژن کے ساتھ آگے بڑھنا چاہتے ہیں۔ ان کا کہنا تھا کہ ماضی میں عوام کی محرومیوں کا ازالہ نہ کرنے والی جماعتیں آئندہ بھی مسائل حل نہیں کر سکتیں، اس لیے عوام کو نئی قیادت اور نئی سوچ کا ساتھ دینا چاہیے۔