علی خامنہ ای کی آخری رسومات کے موقع پر ایران میں عام تعطیل اور یومِ سوگ کا اعلان

(تہران) ایرانی حکومت نے سابق سپریم لیڈر آیت اللہ علی خامنہ ای کی آخری رسومات کے موقع پر 6 جولائی کو ملک بھر میں عام تعطیل کا اعلان کر دیا ہے۔

ایرانی حکومت کی ترجمان فاطمہ مہاجرانی کے مطابق اس تعطیل کا مقصد دارالحکومت تہران میں آخری رسومات میں شرکت کرنے والے سوگواروں کی اپنے آبائی علاقوں کو واپسی کو آسان بنانا ہے۔

حکومتی اعلان کے مطابق ملک بھر میں یومِ سوگ بھی منایا جائے گا، جبکہ آیت اللہ علی خامنہ ای کی نمازِ جنازہ اور آخری رسومات 4 سے 9 جولائی کے دوران تہران، قم اور مشہد میں مرحلہ وار منعقد ہوں گی۔ تدفین مشہد میں واقع امام رضاؑ کے روضے کے احاطے میں 9 جولائی کو کی جائے گی۔

سرکاری شیڈول کے مطابق 4 اور 5 جولائی کو تہران میں عوامی دیدار اور تعزیتی تقریبات ہوں گی، 6 جولائی کو تہران میں جنازے کا مرکزی جلوس نکالا جائے گا، 7 جولائی کو قم میں مذہبی تقریبات منعقد ہوں گی، جبکہ آخری تدفینی مراسم 9 جولائی کو مشہد میں انجام دیے جائیں گے۔

ایرانی ذرائع کے مطابق عراق کے مقدس شہروں بغداد، کاظمین، کربلا اور نجف میں بھی تعزیتی اجتماعات اور دعائیہ تقریبات کا اہتمام کیا جا رہا ہے، جن میں بڑی تعداد میں عزاداروں کی شرکت متوقع ہے۔

یاد رہے کہ ایرانی سرکاری مؤقف کے مطابق آیت اللہ علی خامنہ ای 28 فروری 2026 کو ایران پر مشترکہ امریکی اور اسرائیلی حملوں کے دوران جاں بحق ہوئے تھے، جس کے بعد ان کی تدفین جنگی حالات کے باعث مؤخر کر دی گئی تھی۔