سفیر عاصم افتخار احمد کی اقوام متحدہ کے سیکرٹری جنرل سے الوداعی ملاقات

نیویارک:اقوام متحدہ میں پاکستان کے مستقل نمائندے سفیر عاصم افتخار احمد نے اقوام متحدہ کے سیکرٹری جنرل انتونیو گوٹیرس سے الوداعی ملاقات کی۔

ملاقات کے دوران سیکرٹری جنرل انتونیو گوٹیرس نے اقوام متحدہ کے امن و ترقی کے ایجنڈے کے لیے پاکستان کے قائدانہ کردار اور بھرپور حمایت کو سراہا۔

انہوں نے بالخصوص سلامتی کونسل کے موجودہ رکن کی حیثیت سے پاکستان کی ثالثی کی کوششوں اور مؤثر شراکت کو بھی قابلِ تحسین قرار دیا۔

انتونیو گوٹیرس نے سفیر عاصم افتخار احمد کو پاکستان کا سیکرٹری خارجہ مقرر ہونے پر مبارکباد دی اور ان کے لیے نیک خواہشات کا اظہار کیا۔

اس موقع پر سفیر عاصم افتخار احمد نے اپنے دور میں سیکرٹری جنرل اور ان کی ٹیم کی جانب سے ملنے والی حمایت پر شکریہ ادا کیا۔ انہوں نے انتونیو گوٹیرس کی قیادت اور کثیرالجہتی نظام، اقوام متحدہ کے چارٹر اور بین الاقوامی قانون کے لیے ان کی اصولی حمایت کو بھی سراہا۔