بلوچستان میں ڈپٹی کمشنر کے پروٹیکشن سکواڈ پر حملہ ناکام، دہشت گرد فرار

تمپ: بلوچستان کے مکران ڈویژن کے ضلع تمپ میں سکیورٹی فورسز نے بروقت کارروائی کرتے ہوئے ڈپٹی کمشنر تمپ کے پروٹیکشن سکواڈ پر دہشت گردوں کا حملہ ناکام بنا دیا۔

سکیورٹی ذرائع کے مطابق فتنہ الہندوستان سے منسلک دہشت گردوں نے ڈپٹی کمشنر تمپ کی گاڑی کو نشانہ بنایا اور پروٹیکشن سکواڈ کے اہلکاروں کو اغوا کرنے کی کوشش کی، تاہم سکیورٹی فورسز نے فوری اور مؤثر کارروائی کرتے ہوئے دہشت گردوں کے عزائم ناکام بنا دیے۔

ذرائع کا کہنا ہے کہ سکیورٹی فورسز کی بروقت کارروائی کے نتیجے میں ڈپٹی کمشنر تمپ کے پروٹیکشن سکواڈ میں شامل تمام اہلکاروں کو محفوظ طریقے سے حملے سے نکال لیا گیا۔

سکیورٹی ذرائع کے مطابق کارروائی کے دوران دہشت گرد اپنی گاڑی اور اسلحہ چھوڑ کر فرار ہوگئے۔ فورسز کی مؤثر کارروائی کے نتیجے میں حملہ آوروں کو شدید مزاحمت کا سامنا کرنا پڑا۔

ذرائع نے مزید بتایا کہ کارروائی کے دوران فتنہ الہندوستان کے متعدد دہشت گردوں کے زخمی ہونے کی بھی اطلاعات ہیں۔

سکیورٹی فورسز نے علاقے میں ممکنہ دہشت گردوں کی موجودگی کے پیش نظر کارروائی اور نگرانی کا سلسلہ جاری رکھا ہوا ہے۔