لاہور: عطا اللہ تارڑ کی گاڑی کے قریب ہوائی فائرنگ کرنے والا نوجوان گرفتار

لاہور: وفاقی وزیر اطلاعات و نشریات عطا اللہ تارڑ کی گاڑی کے قریب مبینہ طور پر ہوائی فائرنگ کرنے والے نوجوان کو لاہور پولیس نے گرفتار کر لیا۔

پولیس کے مطابق واقعہ گزشتہ رات لاہور کے علاقے ڈیفنس اے میں پیش آیا، جہاں ملزم نے اپنی گاڑی سے وفاقی وزیر کی گاڑی کو اوور ٹیک کرنے کے بعد مبینہ طور پر ہوائی فائرنگ کی۔

پولیس کا کہنا ہے کہ واقعے کے فوری بعد کارروائی کرتے ہوئے ملزم کو اسلحے سمیت گرفتار کر لیا گیا۔ ملزم کی شناخت اور گرفتاری کے لیے سیف سٹی اتھارٹی کیمروں اور جدید ٹیکنالوجی سے بھی مدد لی گئی۔

وفاقی وزیر اطلاعات عطا اللہ تارڑ نے واقعے کی تفصیلات بتاتے ہوئے کہا کہ وہ اپنے اہل خانہ کے ساتھ سفر کر رہے تھے کہ ایک گاڑی نے بائیں جانب سے انہیں کراس کیا، جس کے بعد نوجوان نے پانچ فائر کیے۔

انہوں نے بتایا کہ واقعے کے بعد انہوں نے مذکورہ گاڑی کا تعاقب کیا اور راستے میں موجود پولیس ناکے کو فوری اطلاع دی، جس پر پولیس نے کارروائی کرتے ہوئے ملزم کو گرفتار کر لیا۔

عطا اللہ تارڑ نے واضح کیا کہ ابتدائی طور پر ایسا محسوس نہیں ہوتا کہ فائرنگ انہیں نشانہ بنانے کے لیے کی گئی تھی، بلکہ ملزم نے ہوائی فائرنگ کی تھی۔

پولیس کا کہنا ہے کہ واقعے کی مزید تحقیقات جاری ہیں اور ملزم سے اسلحے اور واقعے کے محرکات کے حوالے سے پوچھ گچھ کی جا رہی ہے۔