آزاد کشمیر: تاجروں اور ٹرانسپورٹرز کا 29 جون سے کاروبار بحال کرنے کا اعلان، معمولات زندگی بحال ہونا شروع

آزاد کشمیر کے تاجر اور ٹرانسپورٹ رہنماؤں نے 29 جون سے کاروبار اور ٹرانسپورٹ سروس مکمل طور پر بحال رکھنے کا اعلان کر دیا ہے۔

مظفرآباد میں مشترکہ پریس کانفرنس کرتے ہوئے تاجر اور ٹرانسپورٹ رہنماؤں نے کہا کہ جب تک عوامی ایکشن کمیٹی کالعدم قرار نہیں دی گئی تھی، وہ اس کے ساتھ تھے، تاہم موجودہ صورتحال میں وہ اس کی حمایت نہیں کرتے۔

رہنماؤں کا کہنا تھا کہ وہ پاک فوج، پاکستان کے عوام اور حکومت کے خلاف کسی بھی سرگرمی کا حصہ نہیں بن سکتے، کیونکہ مشکل وقت میں ملنے والے تعاون کو فراموش نہیں کیا جا سکتا۔

انہوں نے راولاکوٹ میں جاری سرگرمیوں پر سوال اٹھاتے ہوئے کہا کہ وہاں موجود عناصر ان کی نمائندگی نہیں کرتے۔ ان کے مطابق 12 نشستوں کا معاملہ آئینی نوعیت کا ہے اور یہ تاجروں کا مسئلہ کبھی نہیں رہا۔

تاجر رہنماؤں نے عوامی ایکشن کمیٹی سے اپیل کی کہ وہ موجودہ صورتحال پر نظرثانی کرتے ہوئے مذاکرات اور قانون کے دائرے میں واپس آئیں تاکہ خطے میں معمولات زندگی مکمل طور پر بحال ہو سکیں۔

تاجر رہنما گوہر کشمیری نے اعلان کیا کہ 29 جون سے آزاد کشمیر بھر کے تمام تاجر اپنی دکانیں کھولیں گے اور معمول کے مطابق کاروبار جاری رکھیں گے۔

دوسری جانب آزاد کشمیر کے مختلف علاقوں میں معمولات زندگی بتدریج بحال ہو رہے ہیں۔ مظفرآباد میں میڈیکل اسٹورز، سبزی و فروٹ کی دکانیں اور بیکریاں کھلی ہوئی ہیں، جبکہ میرپور، بھمبر اور ضلع نیلم کے علاقے آٹھ مقام میں بھی کاروباری مراکز جزوی طور پر کھل گئے ہیں۔

انتظامیہ کی جانب سے صورتحال پر مسلسل نظر رکھی جا رہی ہے جبکہ شہریوں کو پرامن ماحول برقرار رکھنے کی ہدایت کی گئی ہے۔