اقوام متحدہ کا عالمی امن کیلئے پاکستان کی خدمات اور قربانیوں کا اعتراف، گوتریس کی شہباز شریف سے ملاقات

نیویارک: وزیراعظم محمد شہباز شریف نے اقوام متحدہ کی جنرل اسمبلی کے 81ویں اجلاس کے موقع پر اقوام متحدہ کے سیکرٹری جنرل انتونیو گوتریس سے ملاقات کی، جس میں عالمی امن و سلامتی، مشرق وسطیٰ کی صورتحال، فلسطین، افغانستان اور اسلاموفوبیا سمیت اہم علاقائی و عالمی امور پر تبادلہ خیال کیا گیا۔

ملاقات کے دوران وزیراعظم شہباز شریف نے کثیرالجہتی نظام کے لیے پاکستان کے عزم کا اعادہ کرتے ہوئے عالمی امن، ترقی اور سلامتی کے فروغ میں اقوام متحدہ کے مرکزی کردار کی اہمیت پر زور دیا۔

وزیراعظم نے اقوام متحدہ کے منشور کے مقاصد اور اصولوں سے پاکستان کی وابستگی کا بھی اعادہ کیا اور سیکرٹری جنرل انتونیو گوتریس کی قیادت کو سراہتے ہوئے انسانیت کی بہتری اور اقوام متحدہ کے منشور کی پاسداری کے لیے ان کی خدمات کو خراج تحسین پیش کیا۔

مشرق وسطیٰ اور فلسطین کی صورتحال پر گفتگو

ملاقات میں مشرق وسطیٰ کی صورتحال سمیت اہم علاقائی امور پر بھی تفصیلی گفتگو ہوئی۔ وزیراعظم شہباز شریف نے خطے میں کشیدگی کے خاتمے کے لیے مکالمے اور سفارت کاری کی اہمیت پر زور دیتے ہوئے امن و استحکام کے لیے پاکستان کے عزم کا اعادہ کیا۔

وزیراعظم نے فلسطینی عوام کے حقِ خودارادیت اور ایک آزاد فلسطینی ریاست کے قیام کے لیے پاکستان کی حمایت بھی دہرائی۔

اسلاموفوبیا کے بڑھتے رجحان پر تشویش

وزیراعظم نے ملاقات کے دوران اسلاموفوبیا کے بڑھتے ہوئے رجحان، خصوصاً پاکستان کے قریبی ہمسایہ خطے میں پیش آنے والے واقعات سے اقوام متحدہ کے سیکرٹری جنرل کو آگاہ کیا۔

شہباز شریف نے اسلاموفوبیا کے تدارک کے لیے مؤثر عالمی اقدامات کی ضرورت پر زور دیا اور اس حوالے سے بین الاقوامی سطح پر عملی کوششیں بڑھانے کی اہمیت اجاگر کی۔

افغانستان اور دہشت گردی کی صورتحال

دونوں رہنماؤں نے افغانستان کی صورتحال اور افغان سرزمین سے ہونے والی دہشت گردی میں اضافے پر بھی تبادلہ خیال کیا۔

ملاقات میں خطے میں امن و استحکام کے لیے مشترکہ کوششوں اور دہشت گردی کے خاتمے کی ضرورت پر بھی بات چیت کی گئی۔

گوتریس کا پاکستان کی خدمات کا اعتراف

اقوام متحدہ کے سیکرٹری جنرل انتونیو گوتریس نے اقوام متحدہ میں پاکستان کے قائدانہ کردار اور مؤثر آواز کو سراہا۔

انہوں نے تنازعات کے پرامن حل اور خطے میں پائیدار امن و استحکام کے لیے پاکستان کی سفارتی اور ثالثی کوششوں کی بھی تعریف کی۔

انتونیو گوتریس نے دہشت گردی کے خلاف جنگ میں عالمی امن کے لیے پاکستان کی خدمات اور قربانیوں کو خراج تحسین پیش کیا۔

ملاقات میں اس عزم کا بھی اعادہ کیا گیا کہ عالمی اور علاقائی چیلنجز سے نمٹنے کے لیے مکالمے، سفارت کاری اور کثیرالجہتی تعاون کو فروغ دیا جائے گا۔