اسلام آباد انصاف مانگنے آ رہے ہیں، گولی نہیں چلنی چاہیے: بیرسٹر گوہر

اسلام آباد: چیئرمین پاکستان تحریک انصاف (پی ٹی آئی) بیرسٹر گوہر نے پنجاب حکومت سے پی ٹی آئی کارکنوں کو ہراساں کرنے اور پکڑ دھکڑ سے گریز کرنے کا مطالبہ کرتے ہوئے کہا ہے کہ اسلام آباد انصاف مانگنے آ رہے ہیں، گولی نہیں چلنی چاہیے۔

اپنے بیان میں بیرسٹر گوہر نے کہا کہ پی ٹی آئی جمہوریت اور ملک کو بچانے کے لیے نکل رہی ہے۔ وزیراعلیٰ خیبرپختونخوا پرامن اور آئین و قانون کے مطابق اسٹریٹ موومنٹ کریں گے۔

انہوں نے پنجاب حکومت، خصوصاً رانا ثناء اللہ، سے مطالبہ کیا کہ وزیراعلیٰ خیبرپختونخوا کے راستے میں رکاوٹیں نہ ڈالی جائیں اور پی ٹی آئی کارکنوں کو ہراساں کرنے یا گرفتار کرنے سے گریز کیا جائے۔

چیئرمین پی ٹی آئی نے کہا کہ سیاسی کشیدگی کم کرنے کے لیے مفاہمت اور بہتر اقدامات کی ضرورت ہے۔ حکومت کو سخت اقدامات کے بجائے بات چیت اور مفاہمت کی طرف بڑھنا چاہیے۔

بیرسٹر گوہر نے بانی پی ٹی آئی عمران خان سے ملاقات اور ان کے اہل خانہ کو ملاقات کی اجازت دینے کا بھی مطالبہ کیا۔

انہوں نے کہا کہ "گولی نہیں چلنی چاہیے، گولی کا وقت ختم ہونا چاہیے۔" ان کا کہنا تھا کہ پی ٹی آئی کارکن اسلام آباد پرامن طریقے سے آئیں گے اور اختلافِ رائے کی قدر کرنا جمہوریت کا حصہ ہے۔

بیرسٹر گوہر نے حکومت پر زور دیا کہ موجودہ سیاسی کشیدگی کو مزید بڑھانے کے بجائے مفاہمت کا راستہ اختیار کیا جائے۔