کوئٹہ سے پشاور جانے والی مسافر بس دانا سر میں کھائی میں جا گری، 40 افراد جاں بحق، متعدد زخمی

ژوب: بلوچستان کے علاقے دانا سر میں کوئٹہ سے پشاور جانے والی مسافر بس گہری کھائی میں گرنے کے نتیجے میں کم از کم 40 افراد جاں بحق جبکہ 8 افراد زخمی ہوگئے۔ حادثے کے بعد ریسکیو اداروں نے امدادی کارروائیاں شروع کر دیں اور زخمیوں کو قریبی ہسپتالوں میں منتقل کیا جا رہا ہے۔

ضلعی انتظامیہ کے مطابق افسوسناک حادثہ ژوب اور ڈیرہ اسماعیل خان کے درمیانی علاقے دانا سر میں پیش آیا، جہاں مسافر بس بے قابو ہو کر کھائی میں جا گری۔ دشوار گزار علاقے کے باعث امدادی کارروائیوں میں مشکلات پیش آئیں، تاہم ریسکیو ٹیمیں فوری طور پر موقع پر پہنچ گئیں۔

وزیراعلیٰ بلوچستان کے معاون شاہد رند نے حادثے میں 40 افراد کے جاں بحق ہونے کی تصدیق کرتے ہوئے بتایا کہ 8 زخمیوں کو طبی امداد کے لیے ہسپتال منتقل کیا گیا ہے۔ ان کا کہنا تھا کہ ضلعی انتظامیہ، ریسکیو ادارے اور متعلقہ محکمے امدادی سرگرمیوں میں مصروف ہیں اور زخمیوں کو ہر ممکن طبی سہولیات فراہم کی جا رہی ہیں۔

شاہد رند کے مطابق ابتدائی معلومات سے معلوم ہوا ہے کہ حادثے کا شکار ہونے والی بس میں اپنے مسافروں کے علاوہ ایک خراب ہونے والی دوسری بس کے مسافر بھی سوار تھے، جس کے باعث بس میں مسافروں کی تعداد معمول سے زیادہ تھی۔

ڈپٹی کمشنر شیرانی ولی کاکڑ نے بتایا کہ ریسکیو اہلکار زخمیوں اور جاں بحق افراد کو کھائی سے نکالنے میں مصروف ہیں۔ ان کے مطابق زخمیوں کو فوری طبی امداد فراہم کرنے اور قریبی ہسپتالوں میں منتقل کرنے کا عمل جاری ہے جبکہ ضلعی انتظامیہ مسلسل صورتحال کی نگرانی کر رہی ہے۔

محکمہ صحت بلوچستان نے حادثے کے بعد قریبی سرکاری ہسپتالوں میں ایمرجنسی نافذ کر دی ہے تاکہ زخمیوں کو بروقت علاج کی سہولت فراہم کی جا سکے۔

دریں اثنا صدرِ مملکت آصف علی زرداری نے ژوب شیرانی شاہراہ پر پیش آنے والے افسوسناک حادثے پر گہرے دکھ اور افسوس کا اظہار کرتے ہوئے جاں بحق افراد کے اہل خانہ سے تعزیت کی ہے۔ انہوں نے متعلقہ اداروں کو ہدایت کی کہ زخمیوں کو ہر ممکن اور بہترین طبی سہولیات کی فراہمی یقینی بنائی جائے اور امدادی کارروائیاں تیز کی جائیں۔