آئی فون 18 پرو مفت حاصل کرنے کا موقع، ٹی موبائل نے نئی پیشکش متعارف کرا دی

امریکی موبائل نیٹ ورک کمپنی ٹی موبائل نے صارفین کے لیے آئی فون 18 پرو مفت حاصل کرنے کی نئی پیشکش متعارف کرا دی ہے۔ یہ آفر فی الحال صرف امریکا میں دستیاب ہے۔

پیشکش سے فائدہ اٹھانے کے لیے صارفین کو کمپنی کا Experience Beyond پلان اختیار کرنا ہوگا۔ نئے صارفین اپنا موجودہ موبائل نمبر ٹی موبائل پر منتقل کرکے آفر حاصل کرسکتے ہیں، جبکہ موجودہ صارفین اہل فون ٹریڈ اِن کرکے آئی فون 18 پرو حاصل کرسکیں گے۔

کمپنی کے مطابق آئی فون کی قیمت پر مکمل رعایت 36 ماہانہ کریڈٹس کے ذریعے فراہم کی جائے گی۔ اس کا مطلب ہے کہ صارفین کو تین سال تک متعلقہ پلان برقرار رکھنا ہوگا تاکہ تمام کریڈٹس مکمل ہوسکیں۔

تاہم آفر میں کچھ اضافی اخراجات بھی شامل ہیں۔ صارفین کو آئی فون کی مکمل قیمت پر عائد مقامی سیلز ٹیکس پیشگی ادا کرنا ہوگا، جبکہ ہر لائن کے لیے 35 ڈالر ڈیوائس کنکشن فیس بھی وصول کی جائے گی۔

یوں آئی فون 18 پرو کی قیمت کریڈٹس کے ذریعے پوری ہونے کے باوجود صارفین کو ٹیکس، کنکشن فیس اور تین سالہ پلان کی شرائط کو مدنظر رکھنا ہوگا۔