چین کا بھارت کے ’اروناچل پردیش‘ کو تسلیم کرنے سے انکار

بیجنگ: چین نے بھارت کے زیرِ انتظام علاقے کو ’اروناچل پردیش‘ قرار دینے اور وہاں مقامات کے نام تبدیل کرنے کے بھارتی اقدام کو مسترد کرتے ہوئے کہا ہے کہ مذکورہ خطہ چین کا حصہ ہے۔

چین کی وزارتِ خارجہ کے ترجمان گو جیاکون نے بھارت کی جانب سے 7 اگست کو نام نہاد ’اروناچل پردیش‘ میں 27 مقامات کے ’معیاری نام‘ جاری کیے جانے پر ردعمل دیتے ہوئے کہا کہ ژانگ نان خطہ چین کا علاقہ ہے۔

ترجمان نے کہا کہ بھارت کی جانب سے چین میں طویل عرصے سے استعمال ہونے والے ناموں کو اپنے نام نہاد ’معیاری ناموں‘ سے تبدیل کرنے کی کوشش غیر قانونی، بے اثر اور کالعدم ہے۔

گو جیاکون کا کہنا تھا کہ بھارت کا یہ اقدام اس حقیقت کو کسی صورت تبدیل نہیں کر سکتا کہ ژانگ نان خطہ چین کا حصہ ہے۔

چینی وزارتِ خارجہ کے ترجمان نے واضح کیا کہ مقامات کے نام تبدیل کرنے کی کوشش سے خطے کی حیثیت کے بارے میں چین کے مؤقف پر کوئی اثر نہیں پڑے گا۔