ایران کو چین سے فوجی امداد کی خبریں من گھڑت ہیں: چینی دفتر خارجہ

(بیجنگ) چین کی وزارت خارجہ نے ایران کو فوجی امداد فراہم کرنے سے متعلق خبروں کو مکمل طور پر من گھڑت اور بے بنیاد قرار دے دیا ہے۔

چینی دفتر خارجہ کے ترجمان نے کہا کہ سوشل میڈیا اور بعض غیر مصدقہ رپورٹس میں یہ دعویٰ کیا جا رہا ہے کہ چین ایران کو فوجی مدد فراہم کر رہا ہے، تاہم ان خبروں میں کوئی صداقت نہیں۔

ترجمان نے واضح کیا کہ چین کی پالیسی ہمیشہ پرامن بقائے باہمی اور سفارتی حل پر مبنی رہی ہے اور بیجنگ کسی بھی غیر ذمہ دارانہ دعوے کی حمایت نہیں کرتا۔

ادھر امریکا کی جانب سے ممکنہ ٹیرف کے حوالے سے بات کرتے ہوئے چینی دفتر خارجہ نے سخت ردعمل دیتے ہوئے کہا ہے کہ اگر امریکا نے اس بنیاد پر کوئی تجارتی پابندیاں یا ٹیرف عائد کیے تو چین بھی مناسب اور متناسب جوابی اقدامات کرے گا۔

چینی حکام کے مطابق تجارتی جنگ کسی کے مفاد میں نہیں اور عالمی معیشت کو نقصان پہنچا سکتی ہے، اس لیے تمام مسائل کا حل مذاکرات اور برابری کی بنیاد پر ہونا چاہیے۔

چینی دفتر خارجہ نے زور دیا کہ غلط معلومات اور افواہوں کو بنیاد بنا کر بین الاقوامی تعلقات کو متاثر نہیں کیا جانا چاہیے۔