کراچی میں 14 گھنٹے لوڈشیڈنگ پر ایم کیو ایم پاکستان کا شدید ردعمل، احتجاج کی دھمکی

(کراچی)متحدہ قومی موومنٹ پاکستان نے کراچی میں 12 سے 14 گھنٹے کی طویل لوڈشیڈنگ کو غیر انسانی قرار دیتے ہوئے شدید ردعمل دیا ہے اور خبردار کیا ہے کہ مسئلہ حل نہ ہوا تو احتجاج کیا جائے گا۔

ایم کیو ایم پاکستان کے رہنماؤں کا کہنا ہے کہ میٹرک امتحانات کے دوران طلبہ شدید گرمی اور حبس میں پیپر دینے پر مجبور ہیں، جبکہ کے الیکٹرک کی بے حسی نے طلبہ کے تعلیمی مستقبل کو خطرے میں ڈال دیا ہے۔

بیان میں کہا گیا کہ شہر قائد کو اندھیروں میں دھکیل کر معاشی و تعلیمی سرگرمیوں کو مفلوج کر دیا گیا ہے، جبکہ شدید گرمی اور حبس میں طویل لوڈشیڈنگ نے عوام کو اذیت میں مبتلا کر دیا ہے۔

ایم کیو ایم پاکستان کے مطابق طویل لوڈشیڈنگ کے باعث بیماروں، بزرگوں اور شیر خوار بچوں کی زندگیاں بھی خطرے میں پڑ گئی ہیں، جبکہ حکومتیں کے الیکٹرک کی من مانیوں پر خاموش تماشائی بنی ہوئی ہیں۔

رہنماؤں نے کہا کہ کراچی کے عوام کے ساتھ سوتیلی ماں جیسا سلوک بند کیا جائے اور بھاری بلوں اور ٹیکسز کے باوجود بدترین لوڈشیڈنگ ناقابلِ قبول ہے۔

ایم کیو ایم پاکستان نے مطالبہ کیا کہ امتحانات کے دوران لوڈشیڈنگ کا فوری خاتمہ یقینی بنایا جائے، بصورت دیگر احتجاج کیا جائے گا۔ بیان میں کہا گیا کہ عوام کا پیمانہ صبر لبریز ہو چکا ہے اور سڑکوں پر آنے کے سوا کوئی راستہ نہیں بچا۔