امریکی فضائیہ کا بی-52 بمبار طیارہ کیلیفورنیا میں تباہ، عملے کے تمام 8 افراد ہلاک

( لاس اینجلس/ رائٹرز ) امریکی فضائیہ کا ایک بی-52 اسٹریٹوفورٹریس بمبار طیارہ پیر کے روز جنوبی کیلیفورنیا کے موہاوی صحرا میں واقع ایڈورڈز ایئر فورس بیس پر ٹیک آف کے دوران حادثے کا شکار ہو کر آگ کی لپیٹ میں آ گیا، جس کے نتیجے میں طیارے میں سوار تمام 8 افراد ہلاک ہو گئے

امریکی فضائیہ کے حکام کے مطابق بوئنگ کمپنی کے تیار کردہ آٹھ انجنوں والے اس اسٹریٹجک بمبار طیارے کو ایک معمول کے تربیتی اور آزمائشی مشن پر روانہ کیا جا رہا تھا کہ زمین سے بلند ہوتے ہی یہ رن وے پر گر کر تباہ ہو گیا۔ حادثے کے بعد جائے وقوعہ سے سیاہ دھوئیں کے گھنے بادل میلوں دور تک دیکھے گئے

ایئر فورس کے کرنل جیمز ہیز نے پریس کانفرنس میں بتایا کہ ہلاک ہونے والوں میں فوجی اہلکاروں کے علاوہ حکومتی کنٹریکٹرز اور سول ملازمین بھی شامل تھے۔ طیارہ ساز کمپنی بوئنگ نے بھی تصدیق کی ہے کہ اس کے دو ملازمین حادثے میں جان کی بازی ہار گئے ہیں۔

حکام کے مطابق پرواز کا مقصد ریڈار جدید کاری پروگرام کی معاونت کرنا تھا۔ حادثے کی وجوہات فوری طور پر معلوم نہیں ہو سکیں اور اس حوالے سے باضابطہ تحقیقات شروع کر دی گئی ہیں۔ امریکی فضائیہ نے تاحال ہلاک ہونے والوں کے نام ظاہر نہیں کیے کیونکہ ان کے اہل خانہ کو مطلع کرنے کا عمل جاری ہے

فضائی مناظر میں حادثے کے مقام پر صحرا کے ایک وسیع علاقے کو جلتے اور دھواں چھوڑتے دیکھا گیا، جبکہ امدادی گاڑیاں علاقے کا محاصرہ کیے ہوئے تھیں۔ حکام کا کہنا ہے کہ رن وے کو شدید نقصان پہنچا ہے، جس کے باعث ایڈورڈز ایئر فورس بیس پر تمام فضائی آپریشنز کم از کم منگل تک معطل کر دیے گئے ہیں۔

ایڈورڈز ایئر فورس بیس امریکی فضائیہ کا سب سے بڑا فضائی آزمائشی مرکز ہے، جہاں ماضی میں کئی تاریخی پروازیں انجام دی جا چکی ہیں، جن میں 1947 میں آواز کی رفتار توڑنے والی پہلی پرواز اور ناسا کے اسپیس شٹلز کی لینڈنگز شامل ہیں

بی-52 اسٹریٹوفورٹریس امریکی فضائیہ کے اسٹریٹجک بمبار بیڑے کی ریڑھ کی ہڈی سمجھا جاتا ہے۔ یہ طیارہ جوہری اور روایتی دونوں اقسام کے ہتھیار لے جانے کی صلاحیت رکھتا ہے اور بغیر ایندھن بھرے 8 ہزار میل سے زائد فاصلے تک پرواز کر سکتا ہے۔

یہ 2016 کے بعد بی-52 طیارے کا پہلا بڑا حادثہ ہے۔ مئی 2016 میں گوام میں اسی طرز کا ایک بمبار طیارہ گر کر تباہ ہوا تھا، تاہم اس حادثے میں عملے کے تمام سات افراد محفوظ رہے تھے